Islandimi tunisassioriaatsit isumassarsiorfigineqarput
Aalisarnermut naalakkersuisoq Ane Hansen Arctic Green Foodimilu pisortaq Johanne Heilmann Petersen, Islandimi aalisakkanik tunisassiorfiit tunisassioriaasiat paasisassarsiorfigalugu angalapput. Angalaneq KNAPK-p Islandimi suleqataanit aaqqissuunneqarpoq.
Allattoq Else Løvstrøm
Aalisakkeriviit assigiinngitsut islandimiut nammineerlutik tulluarsarlugillu inerisarsimasaat ippassamiit aqagumut pulaaqattaarneqarput.
Avammut tuniniaanerit namminneq piorsarsimasaat aamma paasiniaavigineqarput.
Tunisassiorfiit pulaarneqartut tarajorteriviullutillu uulliakkaarillutik tunisassiortartuupput, aamma akitsorteriviit pulaarneqartunut ilaapput.
KNAPK-miit neriuutigineqarpoq angalanerup kingunerisaanik nunatsinni tunisassioriaatsit aalisakkanik igariaannanngortitsinerusut atorneqarnerulissasut.