Islandimi takornariaq bussimi sinittoq mattuttooraat

Takorluulaaruk nunami allami feeriarnerit aallarnerlugu bussimi mattussaasimallutit iterlutit. Hannah Pethanip Islandimi feeriarnera Reykjavikkimi marlunngormat ullaassakkut taama aallartippoq. RUV.is taama allaaserisaqarpoq.

Hanna Pethani Keflavikkip timmisartoqarfianit Reykjavikkimut bussertilluni sinilersimavoq. Kingornalu bussiutileqatigiiffiup Graylinep bussinut inissiisarfiani bussi inoqaranilu taartuinnaasoq iterpoq.

Bussimik ingerlatsisup soraarluni bussi parnaaramiuk arajutsisimavaa.

- Ersisupilussuuvunga (...) Qanoq ilillunga anissanerlunga nalulerpara. Matu patittarpara ikioqqullungalu nilliallunga, tusaaneqanngilangali, Hanna Pethani islandimi tusagassiorfimmut taama oqaluttuarpoq.

Nalunaaquttap akunnerata affaani ikioqqulluni nilliasareerluni ajornartoornermi tuugassaq nassaarivaa, taannalu tooramiuk matu ammarpoq, Ruv.is taama allappoq.

Bussimit anillakkami bussiutileqatigiiffimmi sulisut saaffigai, taakkulu apuuffissaanut ingerlappaat.

Bussiutileqatigiiffiup Graylinep pisoq ajuusaarutigaa, taamatullu pisoqartarnera qaqutigoortupilussuusoq oqaatigalugu, ilaasulli nassataqarlutik bussimut ilaasut amerlagaangata taamatut pisoqarsinnaanerarpaa.

- Ajuusaarutigaarput takusimannginnatsigu itersarlugulu, Greylinep pisortaa Þórdís Lóa Þórhallsdóttir Iceland Monitor-imut taama oqarpoq.

- Ingerlaarneq tamaat sinissinnaasimanera tupinnalaarpoq. Qasusimassaaq, Þórdís Lóa Þórhallsdóttir taama naggasiivoq.

Taamatut pisoqarnera ajuusaarutigalugu Hanna Pethanip akeqanngitsumik takusassarsiortinnissaanik bussiutileqatigiiffiup neqeroorfigisimavaa.