Islandimi taasinissaq nalorninartulik
Tuluit Nunaannut Hollandimullu danskit koruuniisa 30 milliardit missaanniittut utertillugit akilerneqarnissaanni atugassarititat pineqarput.
Nunat pineqartut marluusut taakku ilungersortumik isumaqatiginiarneqarput, utertillugit akiligassat pillugit isumaqatigiissuteqarnissaq Islandip aningaasarsiornerata nammassinnaasaa innuttaasunillu isumaqatigineqartoq anguniarlugu. Isumaqatigiinniarnerilli nalorninartumik inissisimapput, Islandip ministeriunera Jóhanna Sigurdadóttir oqarpoq.
Isumaqatigiinnginneq Icesave-mik taaneqartartoq pillugu inatsimmiippoq Altingimit siorna akuersissutigineqartumi, Islandilli præsidentiata inuit taasitinneqarnissaat piumasaralugu. Taasineq arfininngorpat pissaaq. Innuttaasut naaggaarpata Islandimi aningaasarsiornerup iluarseqqinniarnissaa ajornakusoortorujussuanngorsinnaavoq, aammattaarlu EU-mut ingerlaniarnissaa assorsuaq ajornakusoortorujussuanngorsinnaalluni.
Isumasiuinerit tamarmik ersersippaat Islandimi innuttaasut sisamararterutaasa pingajuisa isumaqatigiissut, naalakkersuisut Tuluit Nunaannik Hollandimillu isumaqatigiissutigisimasaat, itigartikkumaaraat.
Nunat taakku marluk tamarmik Londonimi sakkortuumik isumaqatigiinniareerlutik Island utertitsilluni akiliinissami atugassartitanik qajassuussinerusunik periarfissikkaluarpaat, oqaloqatigiinnerilli sapaatip akunnerani kingullermi isasoorput, Islandimiut isumaqatigiinniartitaasa isumaqatigiissut suli pitsaanerusoq piumagaluaraallu.
Isumaqatigiinniarnerilli ingerlaqqissapput, angusarineqartullu pitsaanerusut anguneqassappata arfininngorpat inunnik taasisitsinissap pinngitsoortivinnissaanut suli periarfissaqarpoq.
