Islandimi Socialdemokratit naalakkersuisunik pilersitsissamaarput
Naalakkersuisunngortut maajimi qinersisoqarnissaata tungaanut atuutissapput.
- Aningaaseriviit ajalusoornerat kisiat pissutiginagu Islandimi silaannaq salittariaqalerparput. Tamannami Konservativit ukiuni 18-ini, ilaatigut ukiuni aqqaneq marlunni Fremskridtsparti tapersersortigalugit aqutsinerisa kinguneranik pisariaqalerpoq. Tassami talerperliuniartumik ingerlatsineq tamanna Islandimi innuttaasut ilarpassuisa kissaatigiunnaarpaat, siornatigut Socialdemokratit avatangiisinut ministeriutitaat Thórunn Sveinbjarnardóttir Ritzauimut oqarpoq.
Taassuma ilanngullugu oqaatigaa, aningaasarsiornikkut ajornartorsiorneq pissutigalugu Islandip ullut ilungersunartut 100-t atoreerai, ullullu tulliuttut 100-t aamma ilungersunartussaasut.
- Inuiaqatigiinni naalakkersuinikkut tunngaviusunik allanngortitsinissaq pisariaqartipparput. Politikerinut inuiaqatigiinnullu tatiginninnerup pilerseqqinneqarnissaa, naalakkersuisunngortut suliassaanni pingaarnerpaavoq, Thórunn Sveinbjarnardottir oqarpoq.
