Islandimi qinigaarlaat akissarsiassaat 44 procentinik qaffaavigineqartut
Islandimi inatsisartunut Altingetimut ilaasortanngorlaat arfininngormat qinersinermi qinigaanertik kisiat nuannaarutigisariaqanngilaat.
Akissarsiaammi aamma qaffanneqangaatsiarput, Islandimi nutaarsiassaqartitsivik Iceland Monitor taama allaaserisaqarpoq.
Altingetimut ilaasortat 63-iusut islandimiut aningaasaataannik 1,1 millionit koruuninik akissarsiaqartalissapput. Tassalu 66.000 koruunit missaannik, akissarsiaasalu qaffariaataat 44 procentiuvoq. Naalakkersuisuni ilaasortat, ministeriunerup præsidentillu akissarsiaat aamma qaffaavigineqarput.
Isumalioqatigiissitaq immikkut ittoq akissarsiat qaffaatissaannik aalajangiisuuvoq. Kjararadillu isumaqalioqatigiissitaanik taaneqartoq naapertorlugu qinigaasut imminnut pilersorsinnaanissaat allanillu isumalluuteqanngissaat pingaartuuvoq.
- Qinikkatut suligamik suliaat suliffeqarnerup sinneranut erseqqissumik atassuteqanngillat aammalu ukiut sisamakkuutaarlugit qinigaaffitsik nutartertariaqartarpaat, isumalioqatigiissitaq nutaarsiassaqartitsivik AFP naapertorlugu taama allappoq.
Akissarsialli qaffaavigineqarnerat tamanit iluarineqanngilaq. Piratpartiimi siuttup Birgitta Jónsdóttirip Altingetimi suleqatini kaammattorpai aningaasarsiat qaffaataannut qujaannaqqullugit.
- Inatsisartuni ilaasortat tamakkerlutik qaffariaatit taakku itigartitsissutigippatigit taava innuttaasunut erseqqissumik nalunaarnerussaaq Altingetip innuttaasullu imminnut ungasinnginnissaat kissaatigigipput, AFP naapertorlugu Facebookimi taama allappoq.
Islandimi arfininngormat qinersinermi partii ataasiinnaq suleqatigiilluunniit amerlanerussuteqanngillat. Taamaammat kikkut Islandimi siuttunngussanersut suli erseqqissumik ilisimaneqanngilaq.