Islandimi qaqqaq innermik anitsisartoq silaannakkut angallannermik akornusersueratarsinnaasoq

Lava qaqqap iluani nassaassaasoq aalasimasoq, Islandimi silasiortut allaffeqarfianneersut uuttortarsimavaat, qaqqallu innermik taamaammat anitseriataarsinnaanera aarleqqutigineqalerpoq:

- Lava qaqqap iluaniittoq aalalersimavoq, arlaannillu pisoqarnera malugisinnaavarput, Islandimi silasiortuni geofysikeri Gunnar Gudmundsson Ekstra Bladetimut oqarpoq.

Islandimi naalagaaffiup politiivi, Hvolsvöllurimilu politiit upalungaarsimanertik annertusisippaat, pisullu malinnaavigeqqissaarneqartut nalunaarutigineqarluni.

Silaannakkut angallanneq eqqorneqaratarsinnaavoq
Qaqqap sermiata aajuitsup ataanit innermik anitsisoqassagaluarpat tamaani ajornartorsiortitsilersinnaavoq, qarsutsinersuaqarsinnaalluni, silaannakkullu angallannermik aamma eqquisinnaalluni. Lavali sukkut aniariataarsinnaanera apeqqutaasoq, Gunnar Gudmundssonip oqaatigaa:

- Qaqqaq innermik suli anitsinngilaq. Innermilli anitsilissaguni qaqqap innermik anitsisup qullaassaasa ajornatorsiutaalersinnaanissaat aarleqqutigineqarsinnaavoq, geofysikeri taanna oqarpoq, nangillunilu:

- Imaassinnaavorlunniit nuna sajuttaqattaaginnartoq, kingornalu susoqaqqinnanilu, imaluunniit kingusinnerusukkut susoqaleriasaartoq, oqarpoq.

Islandimi qaqqaq innermik anitsisartoq Eyjafjallajökull 2010-mi anitserujussuarmat, Europami silaannakkut angallanneq eqqorneqarpoq, Atlantikorlu qulaallugu angallanneq sapaatip-akunnerini arlalinni eqqorneqarluni.