Islandimi politikerit paarsilluarsimanngillat
Nalunaarusiaq 2300-inik qupperneqartoq Islandimi immikkut ittumik misissuisitanit suliarineqarpoq. Misissuisitsineq ukiumik ataatsimik affarmillu sivisussuseqartumik suliarineqartoq, nalunaarusianngorlugu saqqummersinneqarmat, ministeriunerusimasoq Geir Haard sakkortuumik isornartorsiorneqarpoq, taamaatullu aningaasaqarnermut naalakkersuisuusimasut arlaqartut aningaaseriviillu pillugit naalakkersuisutut akisussaasuusoq ataaseq aamma isornartorsiorneqarput.
Islandimi aningaaseriviit anginerit pingasut ukioq 2008-mi ukiakkut akiliisinnaajunnaarlutik matuneqarnerannut patsisaasut paasiniarneqarnissaannut immikkut ittumik misissuisitat inatsisartunit ukioq 2008-mi decembarimi pilersinneqarput.
Islandimi naalakkersuinermik suliaqartut aqutsisui inatsisiliarineqartunik malinnissimannginnerarlugit, upalungaarsimasunillu piareersimatitsisimannginneri pillugit, nalunaarusiami isornartorsiorneqarput.
Ministeriunerusimasoq Geir Haard aningaaserivinnik Skandinaviamiittuni isumaqatigiissuteqartarsimaneranik pasillerneqarpoq, Islandimi naalakkersuisunut saqqummiuteqqaarnagit.
Nalunaarusiaq Islandimi pissanngatigineqarluni utaqqineqarpoq. Nalunaarusiap pisortatigoortumik saqqummiunneqarnissaa ulloq ataaseq sioqqullugu atuakkanik tuniniaavinni nungullugu pisiarineqarsimasoq, nutaarsiassaqartitsivimmi Ritzauimi allaaserineqarpoq.
