Islandimi Piratparti nukittooq

Partii, islandimiutut Píratar-mik atillip, qinersinissap sioqqullugu nukittuutut nalilerneqartut, tuluit aviisiata, The Guardianip allaaseraa.

Partii ima ingerlalluartigaaq, Islandip inatsisartuini 63-inik inissalimmi, piginnaatitsissunnik 18-it 20-illu akornanni Piratpartii pissarsisinnaanissaat, naliliisartunit nalilerneqarluni.

- Upperiuminaallunilu pissanganaqaaq. Piareersimalluarpugulli. Sapiissuseq tunngavigalugu allannguerusuppugut, ersinatalu neriuuteqalersitserusulluta. Nuannareqqusaanngilagut, nuannarineqarpugulli, Piratpartiip siulittaasua Birgitta Jónsdóttir, The Guardianimut oqarpoq.

Piratpartii ukiuni sisamaannarni atanikuuvoq.

Politikkikkut ammanerusoqalernissaa, internetimi killilersuisoqannginnissaa, piginnittussaatitaanerillu pillugit aqqissuusseqqittoqarnissaa ilaasortanit sulissutigineqarpoq.

Paasissutissanittaaq ingerlatitseqqiinikoq, Edward Snowden, Islandimi qimaaffeqarsinnaanissaanik neqeroorfigineqarnissaa partiip sulissutigerusuppaat.

Islandip inatsisartuinut oktoberip ulluisa 29-anni qinersisoqassaaq, qinigaaffillu apriilip qaammataata tungaanut atuukkaluartoq politikkikkut eqqissisimannginneq pissutigalugu ministeriuneq Fremskridtspartiimeersoq, Sigurdur Ingi Johannsson, maanna qinersisoqarnissaanut suaaruteqarpoq.