Islandimi nanoq aallaaneqarpoq
Nanoq qeqertap eqqaani Thistilfjödurip qanittuani nunamut qaqisimavoq. Politiit nannunniartussallu pingasut nanoq naasorissaasup illuata inuerussimasup qanittuani tumisiorlugu nassaaraat aallaallugulu.
- Anginngitsunnguuvoq, kakkaallu meqqorlukkami, taama Svanhvit Geirsdóttir, Saevarlandimeersoq siullersaallunilu nannumik takunnittoq Morgunbladidimut oqarpoq. Taanna politiinut sianereerami qalianut qimarngusimavoq.
Island sapaatip akunnerinik marluinnarnik akunnilimmik nannunit marlunnit 2008-mi tikinneqartarpoq, taakkulu tamarmik aallaaneqarlutik toqunneqarsimapput. Suleqatigiissitaq avatangiisinut ministereqarfimmit pilersinneqartoq tamatuma kingorna aalajangerpoq, nannut Islandimut pisut tamarmik aallaaneqartassasut assigiinngitsut pingasut tunngavigalugit: Tassa, ulorianartuummata, uumasuummata nungutaanissaminnut aarlerinartorsiunngitsut kiisalu taakkua uumatiinnarlugit nuunniarnissaat akisuallaaqimmat.
Nanoq ippassaq pisarineqartoq, paasinarsimmat piaraaqisoq, politiit maanna nunap pisaqarfiup eqqaani nannumik inersimasumik ujarlerput. Nannut Islandip nunataanut pisartut amerlanersaat Kalaallit Nunaanneersuusarput, sikutani tissukaatitissimasuunngikkaangamik aqqut takisooq atorlugu tamaanga naluttartut ilimagineqarpoq.
