Islandimi nannuttoqarpoq

Nanoq Islandip avannaata kitaata tungaani qeqertaasami Hornstrandirimi tammartajaarluni angalaarujoortoq aallaaneqarsimasoq pillugu tusakkat uppernarsineqarput.

Islandimi avatangiisinut pisortaqarfik tusagassiutinut nalunaarummi allappoq nanorsiorfiusumi putserajunnera, tamatumalu kinguneranik nannup tammartajaarluni inoqarfiusumut pinissaa aarlerinarsimmat aallaaneqarsimasoq nalunaarutigaat.

Isafjordurimi politiit nannup avatangiisinut qanoq ulorianaateqartigisinnaanera naliligassarisimavaat. Politiillu nannup aallaneqarnissaa aalajangersimavaat, nanorlu Islandimi nalunaaqutaq 14:20-nngortoq aallaasimagaat, nittartakkatigut nutaarsiassaqarfimmit Visir.is-imit nalunaarutigineqarpoq.

- Nanorsiorneq ingerlanneqarpoq ’Nannumik Islandimut tikittoqarpoq’-mi najoqqutassiaq malillugu. Isafjodurimi politiit nanorsiornermi aqutsisuupput, avatangiisinut pisortaqarfimmit sinniisut, uumasut nakorsaasa pisortaat piniartullu misilittagartuut aamma najuussimapput. Nannup timaa qulimiguulimmik Isafjorduriliaanneqarpoq, tassanngaanniillu Reykjavikiliaanneqassaaq, Naturhistorisk Institutimit misissorneqassalluni, tusagassiutinut nalunaarummi taama allaqqavoq.