Islandimi meeqqat illuat pingaartinneqarpoq

- Meeqqat illuat pilersinneqarmat suliassat amerlasuut paasineqartalersut, tarnip pissusaanik ilisimasalik Islandimi meeqqat illuani atorfilik Thora Einarsdottir oqarpoq.

Meeqqat kinguassiutimikkut atornerlunneqarsimasut nunatsinni katsorsarneqarfigisinnaasaannik soqanngimmat, Meeqqat illuannik pilersitsisoqarnissaa siunertaralugu, peqatigiiffik Meeqqat Inuunerissut, nunatsinneersunik nunanilu allaneersunik Katuami ullumi aqagulu ataatsimeersuartitsissapput.

- Meeqqat kinguaassiutimikkut atornerlunneqarsimasut sullinniarlugit meeqqat illuata pilersinneqarneraniit misilittagarilikkatta takutippaat allannguinermik kinguneqartoq. Politiit, eqqartuussiviit, peqqinnissaqarfiit inunnillu isumaginninnermik sullissisut immitsinnut tatigeqatigiillutta suleqatigiittarpugut. Islandimi meeqqat illuat inuiaqatigiinni aamma ilisimaneqarlualernikuuvoq. Inuiaqatigiinnilu ajornartorsiutip eqqumaffigineqarnera annertusinikuuvoq. Innuttaasullu sianerlutik siunnersorneqarnissaminnut saaffiginnittalernikuupput, soorlu sumut saaffiginnissanerlutik apeqquteqarlutik. Isumaqarpungalu meeqqat illuata pilersinneqarnerasigut suliassat amerlanerit paasineqartalersut, tarnip pissusaanik ilisimasalik Thora Einarsdottir, Katuami oqalugiartussat ilaat oqarpoq.

Islandimi meeqqat kinguaassiutimikkut atornerlunneqartut katsorsarniarlugit meeqqat illuannik 1998-imi pilersitsisoqarpoq. Meeqqat illuat Reykjavikimi inissisimavoq, Islandimilu meeqqat kinguaassiutimikkut atornerlunneqarsimasut katsorsarneqarnissaat tassani isumagisarpaat.

- Meeqqat kinguaassiutimikkut atornerlunneqarsimagaangata taava meeqqat illuanni politiit misissueqqissaarnerannut atatillugu apersorneqarlutillu peqqinnissaqarfimmit misissorneqartarput. Meeqqat Islandimi sumiluunniit najugaqarpata illoqarfigisaminni katsorsartittarput. Meeqqat illuani sulisuusugut nuna tamakkerlugu timmisartumik imaluunniit biilit atorlugit angalasarpugut, meeqqallu najugarisaanni katsorsaanermik ingerlatsisarluta, Thora Einarsdottir oqarpoq.

Island ukiuni kingullerni aningaasaqarniarnikkut ajornartorsiuteqaraluartoq, meeqqat illuat pingaartinneqarluni naalakkersuinikkut aningaasalersorneqarpoq. Kalaallit Nunaannilu meeqqat illuanik pilersitsisoqarnissaa, Thora Einarsdottirip kaammattuutigiinnarsinnaallugu oqarpoq.

- Qaa sulineq aallartiiinnarniarsiuk, suliassaqarpusi. Unalu ataatsimeersuarneq sulinissamut aallarniutaalluarsinnaavoq. Neriuppungalu meeqqat illuanik pilersitsiniarneq inuiaqatigiinni ajornartorsiummik oqallinnermik pilersitsiumaartoq. Islandimimi aningaasaqarniarnikkut ajornartorsioraluarluta meeqqat illuat ingerlapparput, pingaarnersiuinissarmi kisimi apeqqutaavoq. Thora Einarsdottir oqarpoq.