Islandimi meeqqat atugarisaat ajorseriangaatsiarput
Inunnik isumaginninnerup iluani ukiumi kingullermi suliassanngortinneqartut akornanni, meeqqanut attuumassuteqartut siorna taamaalinerani suliassanngortinneqartunut sanilliullugit 40 procentimik amerleriarsimapput.
Meeqqat angajoqqaaminnit annersarneqarsimasut sumiginnakkallu pillugit piffissami kingullermi Islandimi politiinut unnerluussisut amerlasimaqaat. Taamatullu aamma meeqqat aanngajaarniutinik atuisut, allatigut inatsisinik unioqqutitsisut, atuanngitsoortut persuttaanernullu atatillugu siumorneqartartut amerleriarujussuarsimapput.
Islandimi pisortat isumaqarput nunarsuarput kaajallallugu aningaasaqarniarnikkut ajornartorsiorneq pisuunerassallugu suli siusippallaartoq.
Islandimili meeqqanik nakkutilliisut pisortaat oqarpoq, aningaasaqarniarnikkut ilungersunartorsiortoqartillugu eqqorneqarnerpaat ikiorserneqarnissaat eqqumaffigisariaqartoq. Taakkuami meerartaannut erloqinartorsiorneq sunniuteqarnerlunnerusarmat. Angajoqqaalli ilaasa inuiaqatigiinni ajornartorsiortoqartillugu meeqqamik nakkutigilluarnerunissaat paasilluarsimammassuk, meeqqanik nakkutilliisut pisortaata Bragi Gudbrandsenip nuannaajallannartuunerarpaa.
