Islandimi meeqqanut tapiissutit ikilisarniarneqarput
Islandimi akiligassaqarnerput nunanit sanilerisatsinnit ajornerunngilaq, immaqali pitsaanerusutut oqaatigineqarsinnaalluni, Islandimi aningaasaqarnermut ministeri taama oqarsimanerarlugu, nittartagaq icenews.com-imi taama issuarneqarpoq.
Taamatut nalunaaruteqartoqaraluartoq Islandimi naalakkersuisut angajoqqaanngortut meerartaarnerminnut atatillugu sulinngiffeqartarnerat sivikilliniarpaat meeqqanullu tapiissutit ikilisarniarlugit.
Islandimi angajoqqaat sulinngiffeqarnerinut aningaasaateqarfiup aappaagu 1 milliardit koruuninik atuinikinnerunissani naatsorsuutigaa. Tamanna angusinnaajumallugu inatsisitigut pisussaaffiliisumik meerartaarnermut atatillugu sulinngiffeqartarneq sivikillineqassaaq aamma Angajoqqaat sulinngiffeqarnerinut Aningaasaateqarfimmit tunniunneqartartut amerlanerpaaffissaat appartinneqassalluni.
Tamatumunnga peqatigitillugu naalakkersuisut meeqqanut arfineq pingasut inorlugit ukiulinnut tapiissutinik ileqqaarniuteqarniarput. Islandimi angajoqqaat qaammammut Islandimiut koruuniinik 60.000-inik, Danmarkimi koruuninngortillugit 2.880 koruunik naalagaaffimmit tapiiffigineqartarnerat atorunnaarsinneqassaaq.
Nuliariit Danmarkimi koruuninngorlugit qaammammut 9.000 koruuninik akissarsiallit 2.000 koruunit missaannik tapiiffiginikinnerulissapput. Angajoqqaallu qaammammut 12.000 koruuninik akissarsiaqarpata tapiissuteqartoqartassanani.
