Islandimi majimi qinersisoqassaaq
Islandimi maajip ulluisa qulingiluaani qinersisoqassaaq. Ukiut marluk qaangiuppata aatsaat qinersisoqartussaagaluarpoq aningaasarliornerup ajalasoorluinnarnera naalakkersuisunit iliuuseqarfigineqanngippallaarnerarlugu islandimiut sapaatip akunnerini kingullerni akerliussutsimik Reykjavikimi takutitsisaqattaarput.
Allattoq Louise M. Kleemann
januaarip 23-at 2009 09:59
- Ilisimatitsissutigissavara Selvstændighedspartiimi siulersuisut maajip ulluisa qulingiluaanni qinersisoqarnissaa kissaatigimmassuk, nutaarsiassaqartitsivimmi AFP-mi allassimasut naapertorlugit, ministeriuneq Geir Haarde, Selvstændighedspartiimeersoq, oqarpoq.
Taanna aamma ilisimatitsivoq, nammineq qinigassanngorteqqinniarnani. Geir Haarde iggissamigut navianartumik tinuneqalersimavoq, februaarimilu suliaritissalluni.
Nunanut allanut tunngassuteqartunut naalakkersuisup, Ingibjörg Sólrún Gisladóttirip, upernaakkut qinersisoqarnissaa ippassarli taakkartorpaa, qinersinissalli ukiakkut pinissaa ministeriunerup kinguartikkusukkaluarlugu.
Nunarsuatsinni aningaasatigut ajalusoortoqarnerani Nunani Avannarlerni Island eqqugaanerpaavoq.
