Islandimi konservativit ajugaanissartik ilimagaat

Island-imi inatsisartunut qinersineq ullumi pivoq, kikkullu qinigaassanersut suli nalornissutigineqarluni. Ilimagineqarporli konservativit naalakkersuisuni siuttooreersut qinigaaqqinnissaat, ukiunimi makkunani Island-ip aningaasaqarnera pitsaalluinnarpoq. DR-imeersoq Ulla Abildtrup taama paasissutissiivoq:

Aningaasaqarnerput ingerlalluinnarpoq, Island-imiu atuakkiortoq oqarpoq. Aningaasat atukkat, suliffeqarfissuarnut nutaanut atorneqarput, taamaasillunilu Island-imi aningaasaqarneq pitsaalluinnartumik ingerlalluni, atuakkiortoq allappoq.

Ukiuni kingullerni arlaqalersuni, Island-ip aningaasaqarnera ingerlallualeraluttuinnarsimavoq, allaat nunarsuarmi nunani inuulluataarnerit ilaannut ilanngussimallutik. Aningaasanik ilisimasallit allaat oqarput, Islandip aningaasaqarnera pitsaangaarmat, allaat qaqorsaatitut pullassimasutut qaarneqartariaqartutut assersuunneqarsinnaalluni.

Isklandip aningaasaqarneranut siuariartornermut pissutaasunut annerpaapput aalisakkanik tunisassiorneq, takornariaqarnermullu aningaasanik isaatitsineq.

Island-i nunarsuatsinni imminut nittarsaakkaangami, nunatut minguilluinnartutut nittarsaattarpoq, aammalu niuertarfiutitik akimasuunit pisiniarfigineqartartut, takornarianut akimasuunut pilerisaarutitik nittarsaattarpaat. Islandimi innuttaasut illuisa silataanni ikinnerpaamik biilit akisuut pingasut uninngasarput, inuillu atuisarnerat ukioq 2005-imi 12 procentimik qaffassimalluni. Naalakkersuisunilu siulittaasoq Konservativineersoq Geir H Haarde isumaqanngilaq aningaasaqarneq isasinnaasoq, aningaasaateqarluarnerlu atorluarniarlugu, alumiiniuliorfissanik nutaanik sanaartornissaq pilersaarutigaa.

Aamma Islandimi suliffissaaleqisut 2 procentiinnaapput, taamaammat sulisusanik tikerartitsisarnermi Island europami nunanut allanut sanilliullugu, nunanit allamiunit nutserarfigineqarnersaavoq.

Taamaammat naalakkersuisuni siulittaasoq isumaqarpoq qinigaaqqissalluni.