Ippassaq Islandimi nuna sajungaatsiareersoq kingorna annikitsumik aamma sajoqqittoq, Islandimi nutaarsiassaqartitsiviit allaaseraat.
Richterip nunap sajunneranut uuttuutaa naapertorlugu Islandimi nunap sajunnera 6,2-mut uuttorneqarpoq.
Ingammillugooq Reykjavik-imi sajuppillanneqangaatsiarsimavoq. Aserukkat 2000-imi nunap sajunneranut naleqqiullugit annertungaartsiarsimanissaat ilimagineqarpoq. Taamanilu nunap sajunnera richterip nunap sajunneranut uuttuutaa malillugu 6,5-iusimavoq.
Illut aqquserngillu ilaat qupititersimapput. Ikaartarfiillu arlallit matuneqarallarlutik. Annertuumilli ajoqusertoqarsimaneranik nalunaartoqarsimanngitsoq erseqqissaatigineqarpoq. Politiit nalunaarutaat naapertorlugu inuit 30-t annikitsumik ajoqusilaarsimanerarneqarput.
Nunap sajunnerpaaffigisaa illoqarfik Selfoss Rekjavikkimiit kujammut 50 kilometeriinnarnik ungasissuseqarpoq. Illoqarfimmullu tassunga aqquserngit matuneqarsimapput, aviisinilu assini takuneqarsinnaasuni aqquserngit qupiorarsimaqaat.
Annaassiniartartut 300-t nunap sajuffigisaanukartinneqarput iluarsaassiartortinneqarlutik.
Islandimi oqartussat illoqarfiup innuttaanut kajumissaaripput nunap sajoqqeriataarnissaa sillimaffigalugu illup iluaniinnaveersaassasut.
Tassalu imaappoq Selfoss-imi napparsimavik utoqqaallu angerlarsimaffii illup silataani silami tupertinneqarput. Inuillu illumik silataanni tupertiterput nunap sajoqqeriataarnissaanut illup iluaniikkusunnginnamik.