Islandimi innermik anitseqqajaasorinnittoqarpoq

Imeq tatsimit sermersuaqarfimmit Grimsvötnimit pisoq kuuppoq, tamannalu innermik anitsigaluttuartoqarnissamik takussutissaasoq, Islandimi pisortat oqaaseqartittagaat oqarpoq.

Qaqqaq innermik anitsisartoq Eyjafjallajökull apriilip qaammataani arsanik aniatsitsimmat silaannakkut angallanneq Europami tamarmi annertuumik ajornartorsiortitsivoq.

Taamanikkut timmisartortitseqatigiiffiit Europap avannaataa annersasani timmisartuussinitik sapaatip akunneranik ataatsimik sivisutigisumik unitsippaat.

Imeq Islandip sermersuaqarfiata annersaannit, Vatnajökullimit kuuttoq Islandimi qaqqanut innermik aniatsitsisartunut siaruaakkiartorpoq, tamannalu nunap iluani susoqaqqajaaneranik takussutissaasoq, Islandimi sillimaniarnermut naalakkersuisoqarfimmi oqaaseqartittagaq, Gudrun Johannesdottir, oqarpoq.

- Innermik anitsisoqassanersoq misissortariaqarparput, ilaannikkut imermik sermimit aniasoqaleraangat innermik anitsineq aallartittarpoq, kisiannili pinerit tamaasa taamaattoqarneq ajorpoq, Johannesdottir oqarpoq.

Sermersuaqarfik Grimsvötn 2004-mi kingullermik innermik anitsivoq.