Islandimi bankit pisortaasa soraarsitaanissaat kinguartippoq

Islandimi aningaaserivissuup pisortaa David Oddsson pisortatut ingerlaannassaaq. Islandimi naalakkersuisut aningaaserivissuup aqunneqarnera pillugu inatsisissatut siunnersuutaata pingajussaaneerlugu oqaluuserineqarnissaa kinguartinneqarmat, Islandimi Inatsisartut inuutissarsiornermut ataatsimiititaliaani isumaqatigiittoqarsinnaannginnera patsisigalugu kinguartippoq.
Allattoq Lotte Holm
februaarip 24-at 2009 08:06

Naalakkersuisunngorallartut apriilip 25-ata tungaanut atasussat ataatsimiititaliami ikinnerussuteqalermata siornatigut ministeriunerusimasup aningaaserivissuarmi pisortaanini annakkallarpaa.

Islandimi aningaasarsiornikkut ajalusoornermut atatillugu Oddsson aningaaseriviillu pisortaat allat marluk, aningaasarsiornermik aqutsinerlussimanerarlugit sakkortuumik isornartorsiorneqarput. Aamma naalakkersuisunngorallartut aningaaseriviit pisortaasa taakku pingasut soraarsitaanissaat piumasaraat. Pisortat ilaat ataaseq tunuareerpoq, kisianni David Oddsson aamma Eirikur Gudnasson suli tunuarumanngittuarsinnarput.

Aningaaserivissuup aqunneqarnera Islandimiut sivitsortumi naammagittaalliutigisareerpaat. Piffissami kingullermi ullaat tamaasa Reykjavikimi Sedlabanki Islandsip silataani akerliussutsimik takutitsisoqartarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq