Islandimi bankip ittua David Oddson tunuarpoq
Island-ip naalagaaffiata aningaaseriviani pisortaq David Oddsson pisortatut tunuarniarluni nalunaarpoq.
Allattoq Lotte Holm
David Oddson Island-imi naalakkersuisut siulittaasuannit Jòhanna Sigurdardottir-imit sapaatit akunneri arlallit matuma siornatigut tunuaqquneqarpoq, Island-imi aningaasatigut ajalusoorluinnarnerup kingorna.
David Oddsson tunuarnermik pisortatigoortumik nalunaaruteqanngikkaluartoq tusarfiit oqarput, sulisorisani qaninnerpaat ataatsimeeqatigisimagai inuulluqqusimagailu.
Island-imi naalagaaffiup aningaaserivia pillugu inatsisissaq Islandimi inatsisartut ullumikkut oqaluuserissavaat inatsisissami tassani aningaaseriviup pisortaata soraarnissaanik kinguneqartussaavoq.