Islandimi ataatsimeersuarneq naammassilerpoq
Silaannaap allanngoriartornera pillugu nalunaarusiarsuup, nunani tamalaani ilisimatoorpassuit nunallu issittumiittut inuiisa suleqataaffigisaata saqqummiunneqarneranut atatillugu Reykjavikkimi ataatsimeersuarneq, novembarip qulingiluaanit ullumikkumut killeqartoq ulloqeqqata kinguninnguagut naggataarneqassaaq.
Ataatsimeersuarnermi issittumi pissutsit assigiinngitsut pillugit ilisimasallit silaannaap allanngoriartornerata sunniutaanik paasisaminnik saqqummiussipput. Immikkullu maluginiassaavoq, Canadami Inuialuit piniarnermik inuussuteqartut sinnerlugit peqataasut allanngoriartornermi misigisatik tunngavigalugit saqqummiussaqarnerat.
Ataatsimeersuarnermi issittumi nunat inuii Ruslandimeersut, Alaskameersut, Canadameersut, Saamet, Nunatsinnersullu aallartitaqarput. Inuit Issittormiut Kattuffiat sinnerlugu siulittaasoq Sheila Watt Cloutier Nunatsinnilu ICC sinnerlugu Lene Kielsen Holm peqataapput. ICC-p siulittaasuata Sheila Watt Cloutierip ippassaq tikkuarpaa issittumi silaannaap allanngoriartornera pissutigalugu inuit naggueqatigiit eqqugaanerat nunarsuup sinnerani tusaaneqanngippat Inuit pisinnaatitaaffii pillugit suliniuteqarnikkut anguniarneqarumaartoq.
Ullormi kingullermi nunat tamalaat issittumut tunngatillugu 2007-mi ukiorititassaanut tunngasut (International Polar år) saqqummiunneqassapput. Issittup ukiuani Rusland aaqqissuisuussaaq.
