Islandimi arfattassat arfinileriaammik amerlineqarput

Islandimi naalakkersuisut ippassaq tunuartinnagit, aalisarnermut ministerip tunuartup Einar Gudfinnssonip suliaminut kingullernut ilanngullugu, maannamut arfattassiissutigineqartartunit, arfattassat arfinileriaammik amerlivai.
Allattoq Lotte Holm
januaarip 28-at 2009 12:11

Islandimi maannamut tikaagulliusaat qulingiluat tikaagulliillu 50-it arfattassiissutigineqaraluarput, arfattassiissutinili nutaani tikaagulliusaat 150-inut tikaagulliillu aamma 150-inut amerlineqarput.

- Arfattassiissutit nutaat arfannianit naammagisimaarneqarnissaat ilimagaara, aalisarnermut ministeri tunuartoq Selvstændighedspartimeersoq, nutaarsiassaqartitsivimmut AFP-mut oqarpoq.

Gudfinnsonip nutaamik arfattassiinermini Islandimi immami ilisimatusarnermut institutip innersuussutai tunngaviginerarpai. Kisianni Gudfinnsonip naalakkersuisoqatigisimasaasa Socialdemokratit arfattassat taamarsuaq amerlineqarnerat kamaatigisorujussuuaat. Aamma Islandimi pinngortitamik illersuiniaqatigiiffiup Socialdemokratit taperserpai.

- Neriuppunga aalisarnermut ministerinngortussaq arfattassanik amerliliinerup atorunnaarsinneqarnissaanut sapiissuseqassasoq, pinngortitamik illersuiniaqatigiit siulittaasuat Arni Finnsson AFP-mut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq