Islandimi amigartooruteqaqqajaapput
Islandimi amigartooruteqarnissaq qanittuararsuuvoq, Danmarkimi aningaaserivissuaq, Danske Bank, misissueqqammersoq, taama nalunaaruteqarpoq.
Nunat tamat aningaasanik naliliisartoqatigiivisa, Standard og Poors-ikkut, Islandimi aningaasaqarnerup patajaatsooreeraluartup, ajalusoorsinnaanera nalunaarutigaat.
Islandimi ministeriuneq, Halldor Asgrimsson, taama nalunaaruteqarnerup nalaani tunuarpoq.
Standard og Poors-ikkut naliliinerat naapertorlugu Islandimi aningaasaqarneq patajaalluinnariarluni tassanngaannaq naleeruttussanngorpoq.
- Islandimi ministeriunerup tunuarniuteqarneranit tamanna ajorneruvoq, Islandimilu nioqqutissiorfiit tamarmik eqqorneqassapput – pingaartumik nuna allamiut aningaasaliisartut taama navianartorsiornartigisumut aningaasaliinissartik tunuarsimaarutigimmassuk, ajutoortoqarnissaa ilimagaara, Danske Bankimi aningaasat nalinginik qanimut malinnaasut pisortaat, Lars Christensen, nutaarsiassaqartitsivimmut Ritzaumut oqarpoq.
