Islandiliarnissaq taamaatiinnarneqarpoq
Islandimi sungiusaqatigiinnissap taamaatiinnarneqarnera nunanut allanut unammisartut sungiusaasuanut uggornarsimassaqaaq. Nunanummi allanut unammisartut, Nunatsinni Danmarkimilu timersoqatigiiffinni assigiinngitsuniittut, tamakkerlutik katersuuttarneri qaqutigoortuuvoq. Qanoq iliortoqarnissaa paasinarseriarpat Panamerikami Pissartanngorniuunnissamut ukiaru ingerlanneqartussamut anngunniuttoqarnissaanut atatillugu nutaamik pilersaarusiortoqarumaarpoq.
-Unammisartut pisinnaasut kisiisa peqataatillugit Islandiliarnissaq timersornikkut annertunerusumik pissarsiaqarfigineqarsinnaanavianngilaq. Aamma akisuupilussuuvoq, taamaammat akiliutitsinnut pissarsiarisinnaarput naammassanngitsoq naliliisimavugut. Anngunniunnerup Kalaallit Nunaanni ingerlanneqarnissaa pilersaarutigineqarsimagaluarpoq, unammiuaarnermullu taama angitigisumut aningaasat piariaqartut pissarsiarineqarsinnaasimanngillat, nunanut allanut unammisartut sungiusaasuat Niels Møller knr.gl-imut oqarpoq.
Anngunniunnerit Mexicomi imaluunniit Den Dominikanske Republikimi ingerlanneqartussatut maannakkorpiaq isikkoqarpoq, qaquguli pissarnersoq suli aalajangerneqarsimanngilaq. Oktobarimili pinissaa naatsorsuutigineqarpoq, Nunat tamat Assammik arsartartut Kattuffianniilli piffissamik sumiiffimmillu suli maannamut nalunaartoqanngilaq.
-Piffissaq sumiiffissarlu inissinneqariarpata piareersaatit pisariaqartut aatsaat aallartilluarsinnaassavagut. Maannakkorpiaq pilersaarutigisarput malikkallassavarput, paasisaqarneruguttalu naleqqussarumaarlutigu. Kurt Lauritsen attaveqaataavoq, siunissarlu qaninnerusoq ungasinnerulaartorlu pillugit ippassaq sivisuumik oqaloqatigiipput, Niels Møller oqarpoq.
