Island utertitsinissamut isumaqatiginninniassaaq

Islandimi, Tuluit Nunaanni Hollandimilu naalakkersuisut sinniisui sapaatip-akunnerata tulliani ataatsimiissapput Islandimi internetbankip Icesave-p ajalusoornerata kingorna ajunaarutit utertillugit akilerneqarnissaat pillugu nutaamik aaqqissuussinissaq nassaariniarlugu.
aggustip 13-at 2010 15:22

Ritzau-ip allaaserisaa naapertorlugu taama oqarput Islandimi naalakkersuisunut tusarfiit.

- Naalakkersuisutigoortumik isumaqatigiinniarnerit nutaat aggustimi septembarillu naanerani pissapput, Reykjavikimi tusarfik oqarpoq.

Icesave-p 2008-mi ajalusoornerata kingorna tuluit hollandimiullu naalakkersuisuisa Icesave-mut aningaasaliisimasut aningaasaliussaat akilerpaat, aningaaseriviup Islandimiluunniit naalakkersuisut taamaaliorsinnaanngimmata.

Tamatumani koruunit 30 milliardingajaat nunat taakkua marluusut naalakkersuisuisa Islandimit piumasaat pineqarput.

Nunat taakkua pingasut siusinnerusukkut isumaqatigiissuteqarput, tamannalu kinguneqarluni aningaasat ukiuni arlalinni ukiullu 2024-p tungaanut utertillugit akilersorneqassasut 5,5 procentinik ernialerlugit. Isumaqatigiissulli Islandimi qinersisartunit upernassaq atorunnaarsinneqarpoq isumaqatigiinniarillu unittoorlutik.

Suliap isumannaarniarnera Islandip EU-mut iserniarnerani pingaarutilinnik isumaqatigiinniarnerni suliareqqaagassatut pingaarutilittut isigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq