Island tusagassiortunut immikkut pilerinarsarneqassaaq
Islandip nunarsuarmi isummanik naqisimaneqanngitsumik saqqummiisarfittut allanit sallersaalluni atuiffiulernissaa neriuutigalugu suleqatigiissitap ullumi inatsisissatut siunnersuut ataatsimoortoq nutaaq Islandip inatsisartuinut saqqummiuppaa.
Ataatsimut inatsisissami naqisimaneqanngitsumik saqqummiisinnaanerup annertusarnissaa tusarfiillu illersorneqarnissaat pineqarput tusagassiortullu eqqartuussisunut tunniunneqartarnerat illersorneqassalluni.
Smari McCarthy The Icenlandic Modern Media Initiative-mut siunnersuusiortumut oqaaseqartartuusoq ima oqaluttuarpoq:
- The Icelandic Modern Media Initiative-mi inatsisit pitsaanerpaat, nunani naqisimaneqanngitsumik saqqummiisarnermik illersuisunisuni soorlu Sverigemi, Belgiami USA-milu pigineqartut katersorniarneqarput. Inatsisini ataatsimoortuni atuutitinneqalersinnaasuni Island tusagassiortunut illersuiffinngortinneqassaaq pitsaanerpaaq.
Suleqatigiit inatsisissatut siunnersuusiortut naatsorsuutigaat sap. akunnerini aggersuni tamanna taasissutigineqarumaartoq, tassami partiit tamakkerlutik tapersersuilluarmata.
- Isumalluarnaqaaq, tassami suleqatigiit tamarmik soqutiginninnertik takutimmassuk, partiinilu ilaasortat tamangajammik inatsisissamut siunnersuusiortuummata, Smari McCarthy oqaluttuarpoq.
Inatsisartuni ilaasortaq Birgitte Jónsdottir inatsisissamik sulissutiginnittut ilaat isumaqarpoq, naqisimaneqanngitsumik saqqummiisinnaanermut illersuisussaq assut pisariaqartinneqartoq. Taassuma isaani nunarsuarmioqataasugut tusagassiuutitigut naqisimaneqanngitsumik saqqummiisinnaanitsigut aseroriartulersimavugut, suleqatigiiaanillu aningaasaatilissuarnit tusagassiortut nipangersinneqartarlutik eqqartuussivilersuunneqartarlutillu, aammattaaq taanna isumaqarpoq inatsisissatut siunnersuummi EU-mi nunat ilaasortat inatsisiliamik nutarternissaannut pinngitsaalineqarumaartut, pingaartumik Island niueqatigiinnut ilanngutissappat.
Islandimi tamat oqartussaaqataanerat nunarsuarmi pisoqaanerpaanut ilaavoq, tassami Islandimi inatsisartut Alting ukioq 930-mi pilersinneqarsimapput.
