Island, Savalimmiut kalaallillu suleqatigiilerput

Nunatsinni naalakkersuisut arfeqassutsimik naatsorsuisarnermut atatillugu Islandimi, Savalimmiunilu naalakkersuisut suleqatigisussanngorpaat. Taamaaliornikkut arfernik kisitsisarnerit pitsaanerulissasut, nunat avannarliit killiit siunnersuisoqatigiit Islandimi ataatsimiittut isumaqarput.

Nunat avannarliit killiit siunnersuisoqatigiivini ilaasortat Reykjavikip avannaatungaani Isafjurdurimi tikaagulliup neqaanik ippassaani siatartorsimanerminnik unnersiorput.

Bøffit sassaalliutigineqartut Islandip ilisimatusaatigalugu ukiumut tikaagullittarisartagaasa 39-t ilagaat. Kalaallit Nunaalli Islandimut naleqqiullugu allaanerusumik atugaqarpoq, kalaallimmi isornartorsiuinerit kingunerisaannik arfattassatik siorna ikilisariaqarsimammatigik.

Namminersornerullutik Oqartussat kisitsisitigut paasissutissanik amigaateqarnerat Arfanniartarneq pillugu Nunat Tamalaat Kommissioniat Korea Kujallermi juunimi ataatsimeersuarmat isornartorsiorneqangaatsiarput, tamannalu ilaatigut tunngavigalugu, tikaagulliusaartassat affaannanngortinneqarnissaannut kalaallit akuersipput. Taamaattumik ikilisaasoqaqqissanngippat ilisimatusarnerup nukittorsarneqarnissaanik siunertaralugu kalaallit - nunat avannarliit killiit siunnersuisoqatigiivini ilaasortanik suliniuteqarnissamik kaammattorneqarput.

Siunnersuisoqatigiit aalajangersaanissamut pisinnaatitaaffeqanngillat, nunallu pineqartut kaammattorneqarnertik piumanngikkunik malittariaqarnagu. Kaammattuulli iluarisimaarlugu kalaallit aallartitaasa siuttuat Jonathan Motzfeldt oqarpoq:

- Naluneqanngilaq, kalaallit nunaata arfattassanik annaasaqarsimanera. Taamaattumik suleqatigiilluta kitsinerit pitsaanerusut pissarsiariniartalernissaat nukittorsaanissarlu innersuussutigaavut. Silaannakkut kisitsisarnerit saniatigut imaatigut kisitsisoqartalernissaa inassutigaarput, aammali soqutigisaqaqatigiiffiit ilisimasallit suleqatigalugit suliassat ingerlanneqassallutik. Jonathan Motzfeldt oqarpoq.

Jonathan Motzfeldt aamma isumaqarpoq, arfanniarnermik soqutigisaqaqatigiiffiit minnerunngitsumillu avataanit isornartorsiuisartut nunatsinni paasissutissanik katersinissamut piumassuseqartoqarneranik taamaaliornikkut takutinneqartoq.

Nunat avannarliit killiit siunnersuisoqatigiivisa ippassaq ataatsimiinnerminni ilanngullugu inassutigaat, atuakkiortalerumasunik pikkorissaasoqartalissasoq. Taamatuttaaq Narsuarsuarmit Reykjavikimut utimullu timmisartuussisarnerup ingerlaannarnissaa inassutigaat.

Siunnersuisoqatigiit Savalimmiuni aappaagu ataatsimeersuassapput, taakku siulittaasuuffik tigusussanngormassuk.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat