Island Savalimmiullu EU-mik makrelilerngusaaqateqarput

Islandimiut Savalimmiormiullu EU avaqqullugu makrelinik pisassiissutinik qaffaanerat EU-mit assuarineqarpoq.
septembarip 27-at 2010 17:33

EU-mi Aalisarnermut ministerit naapinneranni nunat taakku marluk issuarineqarput, nutaarsiassaqartitsiviillu taaguuserpaat "makrelilerngusaannermik". EU Norgelu peqatigiillutik Islandimiut Savalimmiormiullu assuaraat.

- Makrelit piujuaannarnissaannut ajoqutaarujussuarsinnaavoq aammalu ilisimatuunit naliliiffigineqarsimanera malinneqarsimanngilaq, taama oqarpoq flamskit ministerpræsidentiat, Kris Peeters, belgiamiut sinnerlugit isumaqatigiinniaqataasoq.

Makrelilerngusaanneq aallartippoq, Islandiumiut aggustimi pisassatik 2.000 tonsiniit 130.000 tonsinut qaffammatigit, aamma Savalimmiormiut pisassatik 25.000 tonsiniit 85.000 tonsinut qaffallugit, taamaaliorput EU-miit akuersissummik tunineqaqqaaratik.

Immap kissakkiartornerata pilersitaanik, makrelit Imarpissuup avannaanut illuariarsimapput, tamatumalu kinguneranit Islandiumiut Savalimmiormiullu pisassatik qaffappaat.

EU, Norge, Island aamma Savalimmiut oktobarip aqqaneq aappaanni naapissapput, makrelit tonsit qassit nunat ataasiakkaat pisarisinnaaneraat eqqartorneqassalluni.