Island peqquserluutinik aggortitsivissuunerarpaat
Russeq niuertoq ukiuni kingullerni aningaasaatilissuanngorsimasoq Boris Berezovsky, tuluit nutaarsiassaqartitsivianit Sky News-imit apersorneqarnermini Island tassaanerarpaa Ruslandimi aningaasanik peqquserlunnikkut iluanaarutinik nunanut allanut aningaasaliissutissanngortillugit aggortitsisarfissuaq.
Allattoq Najaaraq Egede
februaarip 14-at 2009 13:29
Berezovskyp Sky News-imut oqarneri Islandip nunanut allanut ministeriata ilumuunngilluinnarnerarpai.
Boris Berezovsky peqquserlussimasutut nunamini pinerluttaalisitsisunit ujaarineqartuuvoq.
Ruslandimi oqartussat oktobarimi nalunaarput, Island aningaasarliorujussuartoq aningaasarpassuarnik atukkerniarlugu aalajangersimallutik. Nalunaarulli kingorna eqqunngitsoq nalunaarutigineqarpoq.
Nutaarsiassaqartitsiviup Sky Newsip Islandip Ruslandillu akornanni pisartunik tusarliussinermini erseqqissaatigaa Ruslandimi oqartussat Islandimut aningaasaliisinnaanissartik suli ammaffigigaat.
Islandip nunanut allanut ministeriata suli Ruslandimut atukkiinissamik isumaqatigiinniuteqarnertik uppernarsarpaa.
