Island kallerup inneranik Skotlandimut tunisisinnaavoq

Kallerup innera kabelikkoortoq Islandimiit Savalimmiunut ingerlaartinneqartoq Islandimut akissarsiutaalluarnera paasineqarpoq. Taamaattumik Siemensip, nunarsuarmi elektronikkinit sanaartornermi annersaasup, misissulerpaa Islandimiit Skotlandimut aamma kallerup inneranik kabeliliisoqassappat imminut akilersinnaassanersoq.
Allattoq Apollo Jeremiassen
marsip 19-at 2010 14:40

Kallerup inneranik pilersuinermi kabelikkoortitsineq takinerpaaq 580 kilometeriuvoq, taannalu kabelersuaq Norgemiit Hollandimut siaarneqarsimavoq.

Islandimiit Skotlandimukartoq piviusunngussaguni kabeli 935 kilometeriussaaq, Islandimi aviis Iceland Review allappoq.

- Taama attaviliineq imminut akilersinnaasoq, aningasarsiornermut ilisimatuup Islandiumuusup, Ketill Sigurjónssonip qularinngilaa. Aamma isumaqarpoq Islandip iluanaarutigisinnaasai 40 millioni koruuniusinnaasut.

Assersuutissaqqissutut taaneqarpoq nalunaarusiami isertuussami allaaserineqarsimasoq, tassalu aluminiumik aatsitsivissuup Century Aluminiumip sarfamik atuinerminut akiliutigisartagai ukiumut 25 millioni koruuniinnaasut. Nalunaarusiaq isertuussaq Islandimiut aviisiinut qanittukkut nassiunneqarsimavoq.

Kallerup inneranik pilersuinermi Europami akigitinneqartartoq agguaqatigiisillugu tassaavoq 70 millioni koruunit.

Kinami ukiumut akigitinneqartartoq agguaqatigiisillugu koruunit 50 millionit 60 millionillu akornaniippoq. Islandimi akiliutaasartoq sanillersuukkaanni agguaqatigiissillugu Island ukiumut 25 million koruuninik akiliisarpoq.

- Tamatuma ersersippaa alumiuniumik aatsitsiviup akiliutigisartagaasa isumaqatigiissusiorfigineqarsimaneri pitsaanngitsuusut, Ketill Sigurjónsson oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq