Island imaanik isumannaallisaanermik annertusaaniarpoq

Islandi Atlantikup avannaani imaani isumannaallisaanerminik annertusaanialerpoq.
Naja Arctica RAL
Assi © : Royal Arctic Line
januaarip 12-at 2009 06:54

Silap pissusaata allanngoriartornerata kingunerisaanik nunarsuup avannaatungaani angallattoqarnerulersimanera, avatangiisinik kingunerlutsitsisumik ajunaarnersuaqarsinnaaneranik aarlerititsivoq.

Taamaammat Islandip nunat avannarliit Atlantikup avannaaniittut suleqatigalugit sillimaffissat sumiinnerinik nalunaarsuiffimmik immap assinganik sulissuteqalerpoq.

Immap assinga upalungaarfissanik tamanik nunani nunarsuup avannaaniittunik takutitsisuussaaq, pinngortitami suumiiffiit, assersuutigalugu umiarsuarsuaq uliakuulissagaluarpat, ulorianartorsiortitaanerpaanersut aamma nalunaarsorneqassallutik.

Nunat avannarliit immap mianerisassartaannut paasissutissanik katersissapput, ukioq 2010 nallertinnagu naammassineqartussamik.