Island illersorsinnaajumalluni isumaqatiginninniarpoq

USA-p sakkutuui Islandimiit tunuareersullu, Island illersorsinnaanissaminut periarfissaqanngilaq. Taamaammat Islandimi naalakkersuisut nunanut Nunat Killiit Illersoqatigiiffiannut, NATO-mut, ilaasortaasunut, Danmarkimut Norgemullu, sakkutooqarnikkut illersorsinnaanissamut maanna isumaqatigiinniuteqarnialerput.

Nunat Killiit Illersoqatigiiffiata, NATO-p, Rigami ataatsimeersuarnerani, Islandimi nunanut allanut ministerip, Valgerdur Sverrisdóttirip, Danmarkip Norgellu nunanut allanut ministeriinut tamanna isumaqatigiissutigaa.

Island, NATO-mut ilaasortaasoq, illersorsinnaassuseqanngilaq. Sorsunneq Nillertumik taaneqartartoq soraarmat, USA-p sakkutuui tunuarput, Keflavikimilu sakkutooqarfiup ingerlanneqarneranut aningaasartuutit annertusinerat tamatuma kingunerisaanik malunniuteqarluni. Amerikamiut sakkutuui kingulliit Islandimiit septembarimi qimagupput. Sakkutuut kingulliit taakku Islandimiitiinnarniarlugit islandimiut naalakkersuisui piffissaq kingulleq tikillugu ilungersoraluarput, amerikamiulli angerlarniarlutik aalajangernertik allanngortikkusunngilaat.

Peqqarniisaarnissamilli sioorasaarisarnerit annertusiartuinnartillugit Islandimi, 300.000-nik innuttaqartumi, sakkutooqarnikkut illersorsinnaanissaq pisariaqarluinnartoq, Islandimi ministeriuneq, Geir Haarde, isumaqarpoq.