Island Games: Pissartaq peqataaniarunnaarpoq
Island Games sioqqullugu sulorarnermi kalaallit nunanut allanut unammisartui sakkukilleriarput. Angutit ataasiakkaarneranni nunatsinni pissartaq Frederik Elsner peqataasinnaajunnaarluni nalunaarpoq nipilersorneq aallunneruniarlugu aammalu timini qajassuunniarlugu.
- Nakorsat kaammattorsimagaluarpaannga sulorartarunnaaqqullunga. Tassa ukiut tallimat kingulliit seeqqora ippigisarsimavara. Seeqqora tape-rlugu nipaallisaatinillu iiseqqaarlunga unammisarpunga, Frederik Elsner KNRimut taama oqarpoq.
Nuna tamakkerlugu sungiusaasup Bjarne Nielsenip taarsiullugu toqqarpaa Mininnguaq Kleist. Frederik Elsnerilu ilisimaneqarpoq rockimik nipilersoqatigiinni Nanook-kunni siuuttut ilaattut nuusiaqqaataallu ”Timmissat taartut” assut nuannarisaavoq.
Maannali tassa ketcheri inaalinneqarallarpoq guitarilu saqqummerneqarluni. Nanook cd-lioqqissamaalerput Isle of Wightimi Island Games-eqarnerata nalaani immiunneqartussamik.
- Piffissaq alla immiussisinnaasimanngilagut. Uggornarporlu Island Gamesip nalaani pisussanngormat. Kisianni aamma timima peqqissuunissaa eqqarsaatigisariaqarpara, Frederik Elsner manna 24-nik ukioqartoq oqarpoq maannalu Hinnarik angalaaqatigaa meeqqanut erinarsuutinik appisimaaqattaarlutik.
- Kisianni ilimagilluinnarpara kalaallit ujaminnakkumaartut Island Gameseqarnissaani. Bror Madsen sungiusarluarsimaguni ujaminnassinnaavoq. Inuusuttut Taatsi Pedersen, Jens Frederik Nielsen aamma Sara Lindskov angusarissaarsinnaapput. Kisianni misilittagaqarnerusinnaapput, Frederik Elsner taama oqarpoq.