Island Games piffissalernagu kinguartinneqartoq
Kalaallit timersortartut nunanut allanut unammisartuisa aappaagu tuluit qeqertaaraanni Guernsey-imi Island Gameseqarnissaa sinnattoriinnartariaqalerpaat.
Unammersuaarnermi piffissalingaanngitsumik kinguartinneqartoq, Island Gamesip siulittaasuata, Jörgen Peterssonip, ippassaq arfininngornermi tusagassiutinut nalunaarutigaa.
AAMMA ATUARUK Qanoq pisoqarnissaanik ataatsimiinneq: Island Gamesip 2021-mi taamaatiinnarsinnaanera isumaliutaavoq
- Nunarsuaq tamakkerlugu tunillaassuunnerup susinnaajunnaarsippaatigut, unammilligassaqartilerlutalu. Nunat ilaasortaatitaqartut peqatigalugit ataatsimiippugut, aappaagulu unammersuartoqassanngitsoq aalajangerluta, Jörgen Petersson oqarpoq.
Kattuffik: Nunatsinni pissartanngorniuuttoqarli
Kalaallit Nunaanni Timersoqatigiit Kattuffianni siulittaasoq, Nuka Kleemann unammersuarnissat taamaatiinnarneqartut amerlimmata oqartussanut piumasaqarpoq.
- Tassa unammersuarnissaq aamma taamaatiinnarpoq. Annilaangatigivarput unammisartut ilaasa taamaatiinnaraat, Kalaallit nunaanni unammersuarnissat aammalu nunani allani unammersuarnissat taamaatiinnarneqarmata. Nuka Kleemann oqarpoq nangillunilu:
- Taamaattumik nunatsinni aalajagiisartut, Namminersorlutik Oqartussallu, nunatsinni unammersuarnissat ingerlanneqassasut aalajangertariaqarput, soorunami nunatsinni Covid 19 tuniluutinngippat, Nuka Kleemann tusagassiuutinut nalunaarumi allapoq.
Taamaatitsiinnarneq timersortartut nualluummut illersorneqarnissaannik, angerlarsimaannarnissamik aalajangiisarnerni nunallu akornanni angalanerit pinaveersaartinnissaannik peqquteqarpoq. Guernsey-imi nunarsuaq tamakkerlugu tunillaassuuttoqalermalli 256-inik tunillatsittoqarpoq, 13-inillu toqusoqarluni.
Nunarput timersuutini arfineq pingasuni peqataatitaqartussaagaluarpoq.
Island Gamesip siulittaasuata unammersuarneq qaqugu ingerlanneqassanersoq akiuminaatsippaa.
- Unammersuarnissap tullissaata ullua ukiualu suli aalajangerneqanngillat. Aningaasat, peqqinneq politikkikkullu pisut eqqarsaatigeqqaarlugit aalajangiissaagut. Pilersaaruteqaleruttali nalunaaruteqarnissarput neriorsuutigaarput, Jörgen Petersson oqarpoq.