Island 60 milliardi koruuninik atorsinnaanngulerpoq

Island aningaasaqarniarnikkut ajornartorsiorfioqisoq 60 milliardi koruuninik ikiorserneqalerpoq. Islandip Nunallu siuarsagassat taarsigassarsiniartarfiata IMF-ip akornanni sapaatip-akunnerni arlaqartuni isumaqatigiinniartoqareersorlu Island 60 milliardi koruuninik atorsinnaanngorpoq. Nutaarsiassaqartitsivik Ritzau taama allaaserinnipoq
Allattoq Mads Lynge
novembarip 20-at 2008 17:08

Aningaasat ilamerngi Danmarkimiit, Norgimiit, Finlandimiit Sverigeminngaanniillu atukkiunneqarput, katillugit 15 milliardi koruunit atukkiunneqassagamik.

- IMF-imik isumaqatigiissusiornerput aallaavigalugu aningaasaqarniarnerput aaqqiiviginiarsinnaalissavarput, avataaninngaanniillu isiginiarneqarnerput innarlerneqarsimaqisoq pitsaanerulersissinnaalissallugu, Islandip ministeriunera Geir Haarde oqarpoq.

Islandip aningaasaqarniarnera ajorsimmalli suliffissaaleqisut amerlipput. Inuit Islandimi suliffissaaleqisut qaammatip ataatsip ingerlanerani 3000-inik ilapput. Aviisimi Morgunbladidimi ullumi taama allaaserinnittoqarpoq.

Angutit suliffigikkajutagaat suliffissaaleqinermik eqqugaanerpaapput, sanaartornermi suliffiit eqqugaanerlunnerpaanut ilaallutik.

Islandimi suliffissaaleqineq 10 procentinut aappaagu qaffassasoq ilisimatuut eqqoriarpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq