Paasissutissatit ataasiinnarmiitinnagit toqqorsivimmulli imaluunniit usb-mut toqqortarlugit. Taamaaliorneq aamma isumatusaarluinnartumik isumannaallisaaneruvoq, Thomas Lund-Sørensen oqarpoq.Assi: KNR // Anton Gundersen Lihn

Qarasaasiakkut isumannaallisaanermut pisortaq: Isissutissat assigiinngitsut 100-t atorpakka

Atortorissaarutini digitaliusuni isissutissat, tassa passwordit, atortumi ataasiinnarmi atussavat. Internettimi isumannaatsuunermik suliaqarfiup - Center for Cybersikkerhedip pisortaa Thomas Lund-Sørensen, sapaatit akunnerata siuliani nunatsinniittoq taama siunersuuteqarpoq.

Eqqaamiugut kisiisa attaveqatigiunnaarnikuuagut, internetti nunarsuaq tamakkerlugu atugaasupilussuuvoq, allaallu nunarsuup illuatungaaniit kilitsissianit qarasaasiagut iserfigineqarsinnaapput. Tamannali akiorniarlugu isissutissaq, tassa passwordi, ataatsimi atugarput allami atoqqinngisaannassagipput, internettimi isumannaatsuunermik suliaqarfiup, danskit illersornissaqarfiata isertortumik paasiniaasartuisa ataanniittup, pisortaata oqaatigaa.

Taannalu marlunnik siunnersuutissaqarpoq.

- Siunnersuutigaara programmi passwordmanagerimik taaguutilik, tassa  isissutissaasivik, oqarasuaammut, qarasaasiamulluunniit, atorneqartassasoq. Taama ittoq iluaqutitaqartupilussuuvoq. Nittartakkanimi tamani isissutissanik assigiinngitsunik atuisinnaavugut eqqaamasariaqarnatigillu, hunnorujunit ikinnerunngitsunik isissutitalik, Thomas Lund-Sørensen KNR-imut oqarpoq.

Qarasaasiakkut isumannaallisaanermut sullissiviup siunnersuutai:

  • Isissutissat atoqqittarnagit
  • Qarasaasiatigut atortorissaarutit nutartertuarlugit
  • Paasissutissat pingaarnerit back-uppiliortarlugit

Pasissutissat pigisagut, soorlu assit, imaluunniit nalunaarsuutit pingaarutillit ataasiinnarmi toqqoqqasassangikkigut taassuma aamma siunnersuutigaa. Taamaammat eqqanaarusernissaq, tassa sikkerhedskoperinissaq, isumatusaarnerusoq pisortaq oqarpoq.

AAMMA ATUARUK Nunarput internetti atorlugu kilitsissiaqarnermit aarlerinartorsiortoq

- Paasissutissatit ataasiinnarmiitinnagit toqqorsivimmulli imaluunniit usb-mut toqqortarlugit. Taamaaliorneq aamma isumatusaarluinnartumik isumannaallisaaneruvoq, Thomas Lund-Sørensen oqarpoq.

Internettimi isumannaatsuunermik suliaqarfik Nunatsinnut tunngatillugu immikkut naliliinikuunngilaq, kisianni tassa aarlerinarnerata qaffasissusaa Danmarkimut aarlerinarneratulli ittoq, pisortaq naliliivoq.

Nunatsinni digitalimik sullissinermut aqutsisoqarfik qarasaasiatigut sillimaniarnermut inatsisissatut siunnersuummik suliaqaleruttorpoq, taanna Internettimi isumannaatsuunermik suliaqarfimmut suleqatigiissinnaanermik ilaatigut periarfissiisinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat