Isikkani malugilaarsinnaanngorpaa
Rita Christensenip qiterminik napisereernermi kingorna ilaquttami akiliunneqarlutik najortigisinnaalernerat assut qujamasuutigaa.
Inatsisartut akuereqqammerpaat inatsit nutaaq qitornat 18-it inorlugit ukiullit Danmarkimi nakorsartittariaqartut angajoqqaaminnit qanigisaminnilluunniit allamit oqartussanit akiliunneqarlutik ilagineqarsinnaanerat.
Rita Christensenip Sjællandip avannaani manna pisussinnaajunnaaqqalluni assakaasulinnik kørestolerneq ilinnialeruttorpaa.
- Ajutoorneq uanga misigisattut atsigisoq pigaangat, inuunerlu allanngorluinnaraangat, timip pisariaqartitai peqqinnissaqarfiup tunniussinnaasai naammakkunnaartarput, qaniginerpaasanilli tarnikkut tapersersorneqarnissaq aatsaat taama pisariaqartitsigineqalersarpoq, Rita Christensen oqarpoq.
-Angerlarsimalluni ajutoorneq allaavoq, qanigisat nalunngisallu imaaliallaannaq pulaarsinnaasarmata, kisianni nunami allamiitilluni soorunami ajornarpoq, taamaattumik nakussassaataaqaaq maani anaanama najormanga.
- USA-miinninni kisimiinneq sungiukkaluaqaara, napparsimalernermili inuunerullu allanngoriataarnerani qanigisaqarnerup pingaassusia ersertarpoq, taamaammat anaanap saninniinnera qujanaqaaq.
Oqaluttuarpoq marsimi ajutoornermi kingorna angajoqqaami, pingaartumillu angutaata tamaviaarluni, aningaasatigut annaasaqaraluarluni, anaanaminik najorteqaannarnissani sorsuutigisimagaa.
- Ataataga anaanama uannik najuiinnarnissaanut suliniarsimaqaaq, aammalu ajutoorama namminersortutut suliani qimaannarlugit USA-mut ornittariaqarnikuullunga. Anaanaga najortigaara, ataatamalu suliassat kinguaattoorutini tamaasa tamaviaarluni maanna angumeriniarsarai, Rita Christensen oqaluttuarpoq.
Rita Christensen qitini sisamanngorlugu napivaa maannamullu pingasoriarluni pilatsereerluni. Maaji aallartilaartoq USA-mit Rigshospitalimut nuutsinneqarpoq. Pisuni tamami ilaqutariit Rita-p najornissaa namminneq akilertarsimavaat.
Rita pisussinnaajunnaaqqanini pillugu Sjællandip avannaani maanna napparsimmavissuarmiippoq, kaassuartakkanillu ingerlateqarneq ilinniarlugu.
- Ilaana ilikkagaqarpunga. Qanoq nammineerlunga kørestolera atorlugu angalaarsinnaanera ilikkarpara. Aamma ippassaani nuannaarutissarsivunga. Nissukka ajutooramali atorsinnaajunnaarpakka, ippassaanili aatsaavissuaq isikkama illua nikisilaarsinnaalerpara. Nukikka sulillutik aallartipput, Rita Christensen unnersiorpoq. Suiariarneralu pillugu pilluaqquarput.