Isikkamik arsaattartut Nuummi katersuupput
Isikkamik arsaallutik nunanut allanut unammisartut 21-t inorlugit ukiullit, tassa U-21-nik taaguuteqartut, Nuummi ullumimiit sungiusaqatigiilissapput. Nunanut allanut unammisartut U-21-t ukiuni tulliuttuni pitsaasumik ineriartuaarnissaat anguniarlugu Nuummi katersuutsinneqarput.
Allattoq Mads Lynge
Isikkamik arsaallutik nunanut allanut unammisartut inersimasunut ikaarsaariarnissaannut sakkussaqarluartinneqarnissaat aamma anguniarneqarpoq.
Arsaattartut 18-it toqqarneqartussaapput, arsaannissamullu kajumissuseqarneq, teknikkigissaarneq, holdeqatiminullu tunniusimaneq toqqaanermi ilaatigut tunuliaqutaassapput.
Unammisartunik katersuutsitsineq Team Grønlandiminngaanniit aningaasalersugaavoq, nunanullu allanut unammisartut Danmarkimi aappaagu katersuutsinneqassallutik.