Isikkamik arsaanneq: Illup iluani pissartanngorniunnissat akuerisaapput
Isikkamik arsaattartut kattuffiani KAK-mi ippassaq anersaaruluttoqarpoq.
Tassami ukioqqortussutsinni assigiinngitsuni illup iluani pissartanngorniuttoqarsinnaanera corona pillugu allattoqarfimmiit akuerineqarpoq.
Malittarisassat imaapput aaqqissuussat amerlasuunik peqataasoqassappata Nunatta nakorsaaneqarfianut qinnuteqartoqaqqaartussaalluni. Tassa 50-it sinnerlugit peqataasoqassappat.
- Nuannaarutigalugu nalunaarutigissavarput pissartanngorniunnerit apriilip 18-at tikillugu pisussat corona pillugu allattoqarfimmiit akuerineqarmata, KAK nalunaarpoq.
AAMMA ATUARUK Futsal: KNI Cup GM-mut misiliineruvoq
Taamaasilluni sapaatip akunnera tulleq niviarsissat nukappissallu U-15-it GM-rsinnaanngorput nukappissat Aasianniissallutik niviarsissat Maniitsumiittussanngortut.
Arnat inersimasut poorskimiit GM-ssapput angutillu GM-qarnissaat Nuummi sapaatip akunnera kingulliulaarlutik aallartissaaq.
Utoqqasaat + 36-nik taaneqartartut porskip kinguninngua Narsami GM-ssapput.
AAMMA ATUARUK KAK illup iluani arsaannermik pissartanngorniuttoqarnissaanik sulissuteqartoq
Aaqqissuussisarnermut malittarisassat maanna atuuttut apriilip 18-ta tungaanut atuummata utoqqasaat +45-nik taaneqartartut apriilip naanerani Nuummi GM-rnissaat eqqorneqarsinnaavoq.
- Apriilip 18-ta kingorna pisussat corona pillugu allattoqarfiup aalajagiiffigisinnaanngilai malittarisassat ingerlaannassanersut suli ilisimaneqanngimmat. Taamaattoq qanimut corona pillugu allattoqarfillu attaveqaqatigiinnerput pitsaasumik ingerlavoq, KAK nalunaarpoq.
Illoqarfinni ukunaniinnaq aaqqissuussisoqarsinnaavoq:
- Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq.
- Aaqqissuussisoqarnissaanut ullut 30-t sioqqullugit illoqarfimmi aaqqissuussiffiusussami tunillatsissimasumik uppernarsaasoqarsimassanngilaq.
- Aaqqissuussineq 50-init amerlanerusunit peqataaffiussappat tamanna Nakorsaaneqarfimmit akuerineqaqqaassaaq. Isiginnaartussat naatsorsorneqartunut ilaassapput.
- Tamatuma saniatigut aaqqissuussisoqarnissaanut ullut 14-it kingulliit iluanni tikittut peqataqqusaanngillat. Inuit ullut 14-it kingulliit iluanni tikittumut qanillisimasut aamma peqataaqqusaanngillat.
- Illoqarfimmi aaqqissuuffiusumi tunillatsissimasumik naammattuuisoqarpat aaqqissuussinermut peqataasut namminneq kommunerisaminnut aallartinnatik coronamik tunillatsissimannginnermut uppernarsarneqaqqaassapput.