Isikkamik arsaanneq Avanersuarmi aallutarilluarpaat

Kalaallit Nunaanni Arsaattartut Kattuffiata, GBU-p, isikkamik arsaannerup periarfissarpassuinik paasititsiniaalluni ukiuni kingullerni pingasoriarluni Qaanaamiissimavoq. Isikkamik arsaannerup nuna tamakkerlugu ineriartortinneqarnissaanik GBU kissaateqarpoq, Qaanaamullu tikeraartarnerit tamatumunnga assersuutissaalluarput.
Allattoq Peter Troelsen, Simon Uldum
juunip 24-at 2013 08:38

Thomas Slosarichip, FIFA-mit akuerisaalluni ilitsersuisartuusup GBU-llu ilitsersuisartua ukiormanna FIFA Football Festival 2013 aaqqissuullugu ingerlappaat. Isikkamik arsaannerup periarfissarpassui ulluni sisamani immikkut sammitinneqarput. Qaanaami nunaqarfinnilu sungiusaasut pilersaarusiornermik, aaqqissuussinermik, isikkamillu arsaannermik aaqqissuussinernik ingerlatsinermik ulluni siullerni marlussunni ilinniartinneqarput, piffissallu sinnerani meeqqanut inuusuttunullu 40-t missaanniittunut isikkamik arsaannermik assigiinngitsunik sammisaqartitsisoqarluni. Peqataasut tamarmik ilaatigut tujuuluaqqamik arsamillu tunineqarput.

Sungiusaasut, FIFA Football Festivalimut peqataasut GBU-p aaqqissuuttagaanik nuannarineqarluartunik Coca Cola fodboldskolenik aasap ingerlanerani illoqarfigisaminni nunaqarfigisaminnilu ingerlatsinissaminnut aamma maanna piareerput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq