Isikkamik arsaalluni GM-ertoqarnera imigassartorfiussanngilaq
Angutit isikkamik arsarlutik nunatsinni pissartanngorniuunnerini Ilulissani ingerlanneqarmata nangikkiartoqarnerani tujorminartumik pisoqarnera taamaasilluni toqqaannartumik kinguneqartinneqartussanngorpoq. Angutit inuusuttut pingasut taamani nangikkiartoqarnerani persuttaasimasutut politiinit unnerluutigineqarput. Nagdlúnguak, isikkamik arsarluni nunatsinni pissartanngorniuunnerni silami ingerlanneqartuni aamma aaqqissuisuusoq maanna aalajangerpoq isikkamik arsaalluni illup iluani nunatsinni pissartanngorniuunnerit imigassartorfiussanngitsut.
- Aasaq pisoq oqaluuseringaatsiarparput. Aamma GIF-ip aallartitanik ataatsimiisitsinerani oktobarimi ingerlanneqartumi eqqaaneqarpoq, tigussaasumilli iliuusissatut pilersaarusiorfigineqarani. Taamatut pisoqartarnera akuerimanagu maanna ersarissumik nalunaarutiginiarlugu aalajangerpugut, Nagdlúnguup siulittaasua Lena Ravn Davidsen oqarpoq.
Isikkamik arsaalluni illup iluani nunatsinni pissartanngorniuunnerit tallimanngornermi marsip aallaqqaataanit sapaammi marsip pingajuanut ingerlanneqartussaapput, holdillu illoqarfimmeersut saniatigut arsartartut 130-it tikittussaallutik. Taakkulu illoqarfimmi sumiiffinni assigiinngitsuni najugaqartinneqartussaapput.
- Pissartanngorniuuttoqarnerata nalaani najugaqarfinni imigassartortoqannginnissaanik aanngaajaarniutinillu allanik atuisoqannginnissaanik aalajangiivugut. Isikkamik arsaalluni illup iluani nunatsinni pissartanngorniuunnerit naggaserlugit medaaliannatsitsinissaq aamma naggataarnersiorluni fiisternertaqanngitsumik ingerlanneqassaaq, Lena Ravn Davidsen nassuiaavoq.
Nagdlúnguup siulersuisui ajornartorsiut sivisuumik eqqartorsimavaat. Nunatsinni pissartanngorniuutsitsinermik aaqqissuinermut aningaasartuuterpassuit matussuserniarlugit timersoqatigiiffippassuit naggataarnersiorluni fiistertitsinerni imigassamik tuniniaasarput.
- Taamatut aalajangiinitsigut aningaasarpassuit pissarsiarinngitsuussallutigit nalunngilarput. Erseqqissumilli nalunaaruteqarnissarput pingaarnerusutut isigaarput. Taamatut nalunaaruteqarnerput imaassinnaavoq aningaasaliisut tusarluarlugu aningaasaliiffigilluaraatigut. Aammali neriuutigaarput sinerissami timersoqatigiiffiit allat assinganik iliornissartik eqqarsaatigiumaaraat, Lena Ravn Davidsen oqarpoq.
Nagdlúnguup siulersuisui GBU tusarniarsinnarlugu tallimanngormat taamatut aalajangiipput. Aalajangiinertaaq Qaasuitsup Kommunianut nalunaarutigineqarsimavoq.
