ASSIT Isiginnaartsitisarfiup nunasiaataasimaneq illaruaatigigaa

Angut immiaaqqamik tigumiartoq, arnaq uilik kommunefogedimut pulaarumatooq, niuertoq qallunaaq inoqatiminut nikaginnittoq. Qallumaap qanga isiginnaartitsissusiortartup, Ludvig Holdbergip, isiginnaartitsisiaa,  Jeppe på Bjerget, najoqutaralugu, Nunasiaataanitsinni pisimasut pillugit Nunatta Isiginnaartitisarfia isiginnaaritsissusiorsimavoq.

Piffissanngorsimavormi nunasiaataasimanitta quiasaarusiarinissaa. 

- Nunasiaataasimaneq qanga eqqartuleraangatsigut, imminnitsinnut nalligerpalulluta eqqartorniartaratsigut, taana "sooruna taama ajornatorsiuteqartigisugut ullumikkut, tassami ilaa nunasiaataasimanerup kinguneri bla bla bla", qissappugut. Kisiannilu arlaatigut iliuuseqarfigerusuppallaarnagu, Mike Thomsen oqarpoq.

- Siumut isigisariaqalerpugut, pisimasullu qaangiutereersut quiasaarutigalugit, Mike Thomsen oqarpoq, taassumalu isiginnaartitsissusiami Jappa inuttaaffigaa.

- Pissutsit qanorluunniit ajortigigaluarpata qanorluunniit artornartigigaluarpata aamma quiajanartuliarisinnaasarariaqarpagut, immitsinnut nalligaluta qiaannaraluarutta nakkaraluttuinnassuugut, kisianni arlaatigut soorlu neriuuteqarpaluttumik qiimanerusumik pissutsit eqqartorsinnaagutsigit, taava aamma isumaqarpunga siuariartornissamik periarfissaqarnerulissalluta, Miki Thomsen taama oqarpoq.

Nunattali nunasiaataasimanera quiasaarutigiitigalugu, aamma isiginnaartitsissummi sammineqartut ilaat ullutsinni suli atuuttut, Svenn Syrin oqarpoq, taassumalu Jappa Kalaallit Nunaanut tulluarsarsimavaa.

- Nunasiaataanerup nalaani pissaanillit kalaallit arlaannik taamungaannaq toqqaariarlutik, kalaallit qanoq ittuunerannut uppernarsaatissaaneraasarnerannut una oqaluttuartutut eqqarsaaataavoq. Kalaallimik pikkorissumik toqqaaneq ajorput, nikanarnerpaamik toqqaasarput  oqarlutik, tassa imaappusi. Taamaannikuuvormi, sulilu taamaattoqarluni, Svenn Syrinn taama oqarpoq.