Isiginnaartitsissut oqaatsit pillugit oqallinnermut akuliuppoq
- Isiginnaartitsissutip immitsinnut ungasilliartuinnarata immitsinnut paasilluarnissatsinnut atorneqarsinnaanissaa neriuutigaara, Nukâka Coster-Waldau oqarpoq.
Isiginnaartitsissummi inuttaaffigisai sisamaapput; arnaq affarmik kalaaleq danskerlu, kalaallisut oqaatsimik annaasaqarsimasoq, nujalerisoq danskeq takornartanut pigiliutiinnakkaminik isumaqartoq, arnaq kalaaleq aqqusinermi aalakoortoq kiisalu tupilak. Isiginnaarutini TV-ni tunuliaqutaasuni, anaana Kalaallit Nunaat, Makka Kleistimit inuttaaffigineqartoq Ataata Danmarkilu Flemming Jensenimit inuttaaffigineqartoq assiliatigut sarsuatinneqassapput.
Nukâka Coster-Waldau oqaluttualiamut annertuumik immersueqataasimavoq.
- Uannut attuumassuteqarluinnarpoq, qitornaqarpungami affarmik danskiullutillu kalaaliusunik, taakkulu kalaaliunertik danskiunertillu tulluusimaarutigisupilussuuaat. Tassuuna ikorfartorusuppakka. Taamaammat oqaloqatigiissinnaanissarput kikkunnullu tamamut inissaqartitsinissarput pingaartittupilussuuara, Kalaallit Nunaannimi kiinarpassuaqarpoq.
Strømsteder/Sarfartuut Nunatsinni ukiaru angallallugu isiginnaartitsissutigineqassaaq.
- Naak kalaaliungaluarlunga kalaaleqatinnut takutinnissaa ernumagilaarpara, aammami oqaluttuassartarigatsigu. Taamaammat Nunatsinnukarnissara pissangagivara, Nukâka Coster-Waldau oqarpoq.
Strømsteder/Sarfartuut Aarhusimi unnuit qulit takutinneqareerpoq, Københavnimilu Teater Grobimi maajip 16-iata tungaanut takutinneqartassalluni. Isiginnaartitsissut Hanne Trap Friisimit Teater Freezeproductionsimeersumit ilitsersuiffigineqarpoq. Aammattaaq Nunatta Isiginnaartitsisarfia suleqataasimavoq.
