Isiginnaartitsisartut assigiingitsut Kiinnat Festival 2018-imi peqataassapput
Isiginnaartitsinermik nuannarisaqartut 100-uusut illoqarfinniit nunaqarfinniillut arfineq pingasuniit aggersuupput, taakkulu isumasioqatigiillutillu namminneq isiginnaagassiaminnik imminnut tamanullu ammasumik takutitsissapput.
Namminneq kajumissutsiminnik isiginnaartitsisartut ukiuni pingasuni kingullerni isumasioqatigiittartut, Isiginnaartitsisarfiup pisortaata susanne Andreassenip oqaatigaa.
- Taakkunanilu siunertaasarsimavoq piumassutsiminnik isiginnaartitsisartut sinerissatsinniittut isiginnaartitseriaatsinik assigiinngitsunik ineriartortitsisinnaanerat kiisalu isiginnaartitsisarfippalaartumik suleriaatsinik sungiusarnissaat.
Isiginnaartitsinermillu nuannarisaqartut nunatsinni tamaneersut naapitsineq peqataasut piukkunnaateqarluarnerannik takunniffiummat, kajumissutsiminnik isiginnaartitsisartunut Nuummi Festivaleqartitsisoqarniarpoq.
Isiginnaartitsisartup Connie Kristoffersenip Festivalertoqalinnginnerani isiginnaartitsisaroqatigiit ataasiakkaat siunnersorniarlugit paasissutissinniarlugillu tikeraarpai.
- Tikeraakkakka pikkoreqaat, namminnerllu isiginnaagassiorniarlutik ilungersorsimaqaat. Minnerunngitsumilli aamma paasivara sumiluunniit inuiaqatigiinni isiginnaartitsisarneq qanoq pingaaruteqartiginersoq, isiginnaartitsisartoq oqarpoq.
Nunatta isiginnaartitsisarfiata peqataasussat 100-it nammineq isiginnaagassiaminnik Nuummi sumiiffinni assigiinngitsuni ulluni aggustip 25-ani 26-anilu isiginnaartitsisussat naapinnissaat qilanaaraa. Isiginnaartitsinissallu tamarmik isiginnaariarnissaat akeqassanngillat.
Kajumissutsiminnik isiginnaartitsisartut Kiinnat Festival 2018-imi peqataasussat Kullorsuarmiit, Innaarsunniit, Ilulissannit, Qasigiannguaniit, Aasiaanniit, Paamiuniitt, Qaqortumiit aamma Tasiilamiit aggersuupput.
