Isiginnaartitsisartunngorniat nutaat sisamat

Nunatta Isiginnaartitsisarfiata ippassaq marsip ulluisa arfineq-pingajuat Arnat Ulluat immikkut immaqa malunnartinnianngikkaluaraa, immikkut iliuuseqartoq oqaatigineqarsinnaavoq.

Isiginnaartitsisartunngorniarlutimmi qinnuteqarsimasut sisamat ippassaq tiguaat, arnat sisamat!

Isiginnaartitsisartunngorniat Nunatsinni ilisimaneqalerumaartussat tassaapput AneMarie Ottosen, Connie Kristoffersen, Kimmernaq Kjeldsen kiisalu Najattaaraq Joelsen.

Isiginnaartitsisartunngorniartussat marluk - erinarsortartoq Kimmernaq Kjeldsen aamma AneMarie Ottosen, Nunatta Isiginnaartitsisarfiup isiginnaartitsissusiaasa ilaanni peqataasareerput, Connie Kristoffersenilu inuusuttunut KNR-TV-kkut aallakaatitanik suliaqartarnikuulluni, Najattaaraq Joelsenilu isiginnaartitsissusiani allani peqataasarnikuulluni.

Nunatta Isiginnaartitsisarfiani ilinniartut siulliit ukiuni marlunni ilinniareerlutik aasaru naammassissapput.