VIDEO Isiginnaartitsisartunngorusukkuit suli periarfissaqarputit

- Qinnuteqaatit internetikkoortut tiguniarneri ajornartorsiorfigigatsigit, qinnuteqarsinnaaneq sivitsorparput. Neriuppugut qinnuteqarusussimagaluit kingusinaartoortutut misigisut periarfissaqalernertik atorluassagaat, Isiginnaartitsinermik Ilinniarfiup pisortaa Makka Kleist taama ilisimatitsivoq.

Ilinniarfik ilinniartunik nutaanik ukioq allaortarlugu aallartitsisarpoq, ilinniartunillu ukioq manna aggustimi aallartitsisoqassalluni.

Isiginnaartitsisartunngorniat siulliit siorna aallartipput, Mike Fencker Thomsen taakkununnga ilaalluni, isiginnaartitsisartutut Tysklandimi maanna suleruttulersoq. Taanna ukiumi kingullermi isiginnaartitseqqaartut akornanni nersornaaserneqartussatut ilaatigut innersuunneqaqqammerpoq, nittartakkamit Cph.culture.dk-mit innersuunneqaqqammerluni.

Isiginnaartitsisartunngorniarnissamik eqqarsaatersuuteqaraanni paasissutissat sukumiinerusut Nunatta Isiginnaartitsisarfiata Facebookikkut quppersagaani takuniarneqarsinnaapput.