Isiginnaartitsisartunngorniarfimmi ilinniartutuaq: - Kiserliornarsinnaavoq

- Kisimiilluni isiginnaartitsisartunngorniartoqarsinnaannginnami.

Nunatta Isiginnaartitsisarfiani kisiartaalluni ilinniartoq Paaliit Mølgaard oqarpoq. Ilinniartut augustusip qaammataani siorna aallartittunit tallimaasunit sisamat ilinniarnerminnik unitsitsiinnarput.

Ilinniarfiup ukiortaami pisortartaarnera pissutaalluni ilinniartut unerarsimasut Paaliit Mølgaard isumaqarpoq. Ilinniartummi ajornartorsiutitik pillugit pisortaminnut saaffiginnikkaangamik illaatigineqaannartarlutik, pimoorunneqanngitsutut misigisarput.

AAMMA ATUARUK Isiginnaartitsisartunngorniap kiserngoruttup ilinniarfik isornartorsiorpaa

Oqaaseqatigiinnginneq ajornartorsiutinut ilaasoq taanna aamma isumaqarpoq.

Paaliit Mølgaardip ilinniartuusimasullu isiginnaartitsisartunngorniarfimmut isornartorsiutaat pillugit ilinniarfimmi pisortaq KNR-imit apersorumagaluarpagut. Pisorli inunnut ataasiakkaanut tunngassuteqarmat isiginnaartitsisartunngorniarfiup oqaaseqarfigiumanngilaa.

Asanninnerujussuaq annaasutullu illugu

Paaliit Mølgaard maanna kisiartaalluni ilinniartuuvoq, tamannalu kiserliornarsinnaasoq taassuma oqaatigaa.

- Ilinniaqatigiilluta ullormut tiimerpassuit najortuaannarnikuuvugut, taamaammallu inuttut imitsinnut qanittuararsuanngornikuulluta.

- Kammalaatigiinneq sakkortoorujussuaq ataqatigiinnerujussuaq, immaqa asanninnerujussuarmik taallugu, annaasutullu illugu annernartorujussuullunilu kiserliornartorujussuuvoq.

- Oqaloqatigiinnitsinni, kingumut qiviarnitsinni naliliisarnitsinnilu immitsinnut ilinniarfigisorujussuusarpugut. Taava uanga ilikkakkakka kisima nammineq imminut aallaavigiinnalissaguma annikittuararsuupput.

Atuaqatitit tamarmik unipput, sooruna illit ingerlaqqittutit?

- Suliara suli naammassinngimmat. Aamma ilinniagaq una piumasarivissorlugu piumasarigakku aqutsisunut tunniutiinnarniannginnama ingerlaqqippunga, Paaliit Mølgaard oqarpoq.

Isiginnaartitsisartunngorniarfik immikkut illuinnartumik iliuuseqarpoq tassalu aasakkut sulinngiffeqarneq qaangiuppat tallimanik nutaanik ilinniartoqalissaaq.