Isiginnaartitsisartoqarnermut inatsisissaq kulturilu pillugu politikki piareersarneqalereerput

Kulturi ulluni kingullerni sammineqartaqaaq, ilaatigut kulturi eqqarsaatigalugu politikerit aningaasaliinngippallaarnerat oqaluuserineqarluni.
Allattoq Najaaraq Egede
oktobarip 04-at 2007 15:36

Kulturi pillugu Siunnersuisoqatigiit siorna pilersinneqartut tallimanngormat akerliussutsimik takutitsinermut soqutiginnillutik malinnaapput. Siulittaasoq Inge Olsvig Brandt ima oqarpoq:

-Soorlu kulturilerineq eqqartorlugu aallartilluarlugu ingerlaaqatigiit naalakkersuisunut oqariartuuteqarput, soorlu eqqartorneqarlutik kalaallisuut, aamma kalaallit Nunaanni ileqqugut. Kisianni aamma eqqartorneqarlutik eqqumiitsuliortut uku eqqalersitsisartut isumaliulersitsisartulluunniit. Taakkulu pineqarnerini sulianut toqqammavissat aningaasat tungaatigut ajortuusoq taaneqarpoq, Inge Olsvig Brandt oqarpoq.

Taamaammat isumaqarpoq oqariartuuterpassuit ilaanni innuttaasunik paatsiveerutitsisinnaasarput. Kulturili siunissami pimoorussilluni eqeersarniarneqarpoq.

Siunnersuisoqatigiimmitaava suliaat sumut killippaa?

- Oqaatigissavara suliaq soorunami aallartimmat uagut iluatsinni aaqqitassat annertungaatsiartut suliniutitsinnut tunngasut aaqqinniarnikuugatsigit, aallartippoq.

Suliat tallimat angisuut iluini pingaarnersiusoqarpoq, tassanilu isiginnaartitsinermut inatsisiliornissamut siunnersuusiornissaq saniatigullu kulturpolitikkimut siunnersuuteqarnissaq suliassatut siulliutassatut aalajangerneqarput.

Isiginnaartitsinermut inatsisiliornissamut siunnersuusiortussamik suleqatigiissitaliortoqarpoq, inatsisilerituumik, KIIIP-imi atorfilinnik marlunnik aamma isiginnaartitsisartoqatigiinnit KAISKA-mit Silamiunillu inuttaqartinneqartumik.

- Takorloorparput qinigaaffiup matuma iluani suliassat pinngitsoorata naammassissagigut, Inge Olsvig Brandt oqarpoq.

Aamma kulturimut politikkeqalernissamut tunngasoq akunnerminni eqqartortalereerpaat.

- Kulturpolitikki sunaava? Qanoq isumaqarpa? Sunik aallaaveqassava? Kikkut suleqatigissavagut? Apeqqutillu allarpassuit akiniagassaraat. Aallaavigineqassaarlu kulturpolitikki 2004-imi siunnersuutaareersoq. Suliaq ingerlapparput, ingerlaqqinniassammat.

Kulturi pillugu Siunnersuisoqatigiit siulittaasuat Inge Olsvig Brandt aamma oqarpoq, siunnersuisoqatigiit decembarimi tullianik ataatsimiissasut, tassanilu killiffiit eqqartorneqassasut. Siunnersuisoqatigiit atuakkiortut, isiginnaartitsisartut, eqqumiitsuliortut, nipilersortartut, erinarsoqatigiit aamma assiliisartut akornannit toqqakkanik inuttaqartinneqarpoq.

Siunnersuisoqatigiit suliassamik angisuut saniatigut ulluinnarni Naalakkersuisunut inatsisartunullu namminenq siunnersuisinnaasarput taakkunanngalu suliakkerneqarsinnaallutik.