Isiginnaartitsinermut inatsit pisariaqarpoq
Inatsisartunut ilaasortat kultureqarnermut naalakkersuisumit Doris Jakobsen-imit, Silamiukkut isiginnaartitsissusiaannut isiginnaartitsissummik Eskimuunguumut, ataasinngormat novemberip ulluisa arfernani isiginnaariaqqullugit aggersarneqarput.
Inatsisartuni ilaasortanit 31-iusunit arfinillit kisimik isiginnaariarput isiginnaariartullu isumaqarput kalaallit nunaani isiginnaartitsisartoqartariaqartoq isiginnaartitsinermullu inatsiseqartariaqartoq.
Naalakkersuinermik suliaqartut aggersarsimavakka Silamiukkut tapersersornialugit. Isiginnaartitsisartoqarneq pillugu inatsisiliortariaqarpugut isiginnaartitsissutinillu amerlanerusunik takutitsisoqarsinnaasariaqarpoq, Doris Jakobsen oqarpoq. Inatsisartunut ilaasortat Jens B Frederiksen Demokratinit inatsisartullu kultureqarnermut ataatsimiititaliaani siulittaasuusoq Juliane Henningsen IA, aliikkusersorneqarluarsimanerarput, tamarmillu isumaqarput, isiginnaartitsisartoq pillugu inatsisiliortoqartariaqartoq, taamaattorli aningaasatigut pisinnaasat apeqquserneqarput, soorlu Jens B Frederiksen oqarpoq, kultur aningaasanik naleqartarmat tulleriaarinissat pisariaqartartuusut.
