Isiginnaartitsisartutut ilinniarneq inuussutissarsiutinik ukiunik marlunnik sivisussuseqartumik ilinniarfiunani bacheloritut ukiunik pingasunik sivisussusilimmik ilinniarfiussaaq. Nunatta Isiginnaartitsinermik Ilinniarfianit taama isumaqarput.Assi: Edvard Lyberth-Mørch (Nunatta Isiginnaartitsisarfia)

Isiginnaartitsinermik ilinniarfik: Isiginnaartitsisartutut ilinniarneq ukiunik pingasunik sivisissuseqartariaqarpoq

Isiginnaartitsisartutut ilinniarneq inuussutissarsiutinik ukiunik marlunnik sivisussuseqartumik ilinniarfiunani bacheloritut ukiunik pingasunik sivisussusilimmik ilinniarfiussaaq. Nunatta Isiginnaartitsinermik Ilinniarfianit taama isumaqarput.

Isiginnaartitsisartussamik ilinniartitsineq sivisuvoq, tamatumunngalu ukiunilu marlunni ilinniarnissaq sivikippallaarpoq. Nunatta Isiginnaartitsinermik Ilinniarfianit taama isumaqarput.

Taamaammat isiginnaartitsisutut ilinniarnerup Bachelor of Fine Arts in Actinginngornissaanik innersuussusiani ilinniarfiup Naalakkersuisunut tunniuppaa. Taamalu ilinniarneq ukiunik puingasunik sivisussuseqassaaq.

Taamaattoqarpat ilinniartut isigiginnaartitseriaatsinik aalajangersimasunik ukkaqarsinnaanissamut periarfissaqalissasut, Nunatta Isiginnaartitsinermik Ilinniarfiata pisortaa Ruth Montgomery-Andersen oqarpoq.

- Dramaturgitut ilitsersuisutulluunniit ilinniagaqarsinnaassapput. Silarsuup sinnerani taamaattunngorniaraanni qaffasissumik ilinniarfimmi ilinniarnissamut qinnuteqartoqartariaqartarpoq. Bacheloritut ilinniagaqarunik taamaattunngornissaminnut periarfissaqassapput, pisortaq oqarpoq.

Eqqumiitsuliornermik tunngaveqaannassasoq

Ilinniarfik bacheloritut ilinniarfiulissaguni nunarsuup sinnerani isiginnaartitsisunngorniarfinnik bacheloritut ilinniarfiusunik suleqateqarsinnaanerulissasoq, Ruth Montgomery-Andersen nassuiaavoq.

Bacheloritullu ilinniarfinngussagaluaruni eqqumiitsuliornermik suli tunngaveqassaaq.

- Eqqumiitsuliornermik suli ilinniarfiunissaata erseqqissarnissaa pingaaruteqarpoq, isiginnaartisisarfimmi pisortaq Susanne Andreasen oqarpoq.

Bacheloritut ukiunik pingasunik sivisussusilimmik ilinniarfinngussappat, ilinniarneq sivisuneruliinnarnani aamma namminersorlutik ineriartortitsisinnaanermik ilinniarfiusinnaalissaaq. Soorlu assersuutigalugu ilinniartut nammineq suliamik aningaasalersornissaannut isumattorsaaqatigiisitsinikkut qanoq aningaasarsiortoqarsinnaanersoq ilinniarneqarsinnaassasoq, Ruth Montgomery-Andersen oqarpoq.

Qangalili kissaatigisaq

Isiginnaartitsinermik ilinniarfiup nunatsinni bacheloritut ukiunik pingasunik sivisussusilimmik ilinniarfeqarnissaanik kissaataa nutaajunngilaq. Ilinniarfik 2012-imi pilersinneqarmat, ilinniarfik nunat tamalaat akornanni akuerisaatinniarlugu ilinniartut isiginnaartitsinermik bacheloritut ukiuni pingasuni ilinniarsinnaanissaat siunertaavoq. Aningaasartuutissalli pissutigalugit taamani taamaaliorsinnaasimanngillat, taamaammallu inuussutissarsiutinik ullumikkut ilinniarfiusoq, Ruth Montgomery-Andersen nassuiaavoq.

- Nunat tamalaat akornanni akuerisaasinnaanissaa pillugu aallartinneqareertoq maannakkut sulissutigaarput. Taamaalilluni ilinniartut ilinniakkaminnik naammassinnikkunik ingerlaqqiffiusumik ilinniagaqarsinnaassapput, taanna oqarpoq.

Isiginnaartitsisunngorniaraannilu Isiginnaartitsinermik Ilinniarfimmi ukiuni marlunni ilinniarneq naammanngitsoq, Susanne Andreassen oqarpoq.

- Ukiuni marlunni ilinniaraanni naammassisaqanngitsuugaqartoqartartoq takusinnaasarparput. Ilinniartitsissutit ilaat ukiuni marlunni ilinniarfimmi inissaqartinneq ajorpagut, Andreassen oqarpoq.

Ilinniarfimmi ilinnialertussatut ukiut marlukkaarlugit akuerineqartartut ullumi amerlanerpaamik tallimaasarput. Aaqqissuussami nutaami ukiut pingasukkaarlugit ilinnialertoqartassasoq Nunatta Isiginnaartitsinermik Ilinniarfiata siunnersuutigaa.

- Taamaalilluni amerlanerulernavianngillat, ilinniagaalli pitsaanerulissaaq, Ruth Montgomery- Andersen oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat