ASSIT Isiginnaagassiatoqaq ilinniartunit nutarterneqartoq
Isiginnaagassiaq pisoqaagaluartoq ullumikkut suli pingaaruteqartutut isigineqarpoq. Ilitsersuisoq naapertorlugu inuit tamavitta kinaassuserput tunuliaquterpullu nalunngilluinnartariaqarparput.
- Inuit ajornartorsiuteqaratik nuannaarlutik inuusut, taava tassanngaannaq ilimaginngisaminnik takkuttoqartoq taannalu takkuttoq ajortuulluni aqutsiniaasoq, Nunatta Isiginnaartitsisarfiani ilinniartup isiginnaagassiaq INUIT-mi inuttaasut ilaat, Nukakkuluk Kreutzmann inuttaaffigisani taama nassuiaatigaa.
Isiginnaagassiaq INUIT Reidar Nilssonimit ukiut 42-t matuma siorna allaaserineqarpoq, kingornalu isiginnaagassiarineqarluni. Inuit inooreersut inooriaasaat allanngortinneqaraangata inuup nammineq kinaassutsini ilisimaarinissaa pingaaruteqartuusoq, Isiginnaagassiap oqariartuutaa Isiginnaartitsinermik Ilinniarfiup pisortaata, Varste Mathæussenip nassuiarpaa.
- Tunumut qiviartariaqartarneq oqaluttuarisaanitsinnut siulitsinnut ilisimasaqarnissaq tassunga atatillugu una isiginnaagassiaq soorlu aamma maani ilinniartunut sammitipparput. Taanna tunuliaqut ilinniartut pinngitsooratik nalunngittariaqarmassuk, Varste Mathæussen taama oqarpoq.
Kinaassutsilli allanngortinnissaa isiginnaartitsisartutut imaannaanngilaq.
- Sakkortunaarpara. Aamma pulaffiginiarnera inuttaaffigisama artornalaarnermik, pulaniarsarinarnermik inuttaaffinnut. Kisianni nuanneqaaq allat misilinnikuusaat misilillugu, Nukakkuluk Kreutzmann taama oqarpoq.
Taamakkaluartoq isiginnaagassiaq isiginnaartitsissutigineqareernikup isiginnaartitsissutigeqqinnera ima oqaatigaa:
- Nuanneq. Allat takusareerlugit isiginnaartitsisartut qanoq ittuunersut taava nammineq aamma misilikkusullugu, taakku isiginnaartitsisartut misiginikuusaat uanga misigisinnaalerlugu, Nunatta Isiginnaartitsisarfiani ilinniartoq Nukakkuluk Kreutzmann taama oqarpoq.
Isiginnaagassiaq Nunatta Isiginnaartitsisarfiani tallimanngorpat nalunaaqutaq unnukkut arfineq-pingasunut isiginnariarneqarsinnaavoq.
